TAIFA STARS YACHAPWA 3-0 NA DRC DAR

TANZANIA imepoteza nafasi ya kufuzu kwa mara ya kwanza Fainali za Kombe la Dunia baada ya kuchapwa 3-0 nyumbani na Jamhuri ya Kidemokrasia ya Kongo (DRC) jioni ya leo Uwanja wa Benjamin Mkapa Jijini Dar es Salaam.
Mabao ya Leopards yamefungwa na kiungo wa Lille ya Ufaransa, Gael Romeo Kakuta Mambenga dakika ya sita, beki wa Cape Town City ya Afrika Kusini, Nathan Idumba Fasika na mshambuliaji wa Sharjah ya Dubai, Ben Malango Ngita dakika ya 85.
Kwa matokeo hayo, Leopards inafikisha pointi nane na kupanda nafasi ya pili Kundi J ikiizidi pointi moja Taifa Stars kuelekea mechi za mwisho Jumapili.

Baada ya ushindi wa 2-0 dhidi ya Madagascar Uwanja wa l'Amitié Jijini Cotonou, Benin sasa inangoza kundi hilo kwa pointi zake 10 kuelekea mechi ya mwisho na DRC Jumapili Kinshasa.

Madagascar watakuwa wenyeji wa Tanzania kwenye mechi ya mwisho Jumapili Jijini Antananarivo.

Thursday, November 11, 2021