SAMATTA: HATUTAICHUKULIA POA SLAVIA PRAHA, KATIKA MICHUANO YA EUROPA LEAGUE HAKUNA TIMU YA KUBEZA

Na Mwandishi Wetu, DAR ES SALAAM

MSHAMBULIAJI wa KRC Genk ya Ubelgiji, Mtanzania Mbwana Ally Samatta amesema kwamba hawataidharau Slavia Praha ya Jamhuri ya Czech waliyopangwa nayo katika hatua ya 32 ya michuano ya Europa League.

“Hakuna timu ya kubeza katika mashindano hayo, tutajiandaa vyema kukabiliana nayo, lengo letu ni kufika mbali ikibidi kuchukua hadi Kombe,”amesema Samatta alipozungumza na Bin Zubeiry Sports – Online mapema leo.

Pamoja na KRC Genk kupangiwa S.K. Slavia Praha ya Jamhuri ya Czech, katika hatua ya 32 ya Europa League baada ya droo iliyopangwa jana mjini Nyon, Uswisi timu za England, Arsenal na Chelsea nazo zimepata wapinzani hafifu kidogo.

Mbwana Samatta atakutana na Slavia Praha ya Jamhuri ya Czech katika hatua ya 32 ya Europa League

RATIBA HATUA YA 32 BORA MICHUANO YA EUROPA LEAGUE

Viktoria Plzen vs Dinamo Zagreb

Brugge vs Salzburg

Rapid Vienna vs Inter Milan 

Slavia Prague vs Genk

Krasnodar vs Bayer Leverkusen

Zurich vs Napoli 

Malmo vs Chelsea 

Shakhtar Donetsk vs Eintracht Frankfurt  

Celtic vs Valencia 

Rennes vs Real Betis 

Olympiacos vs Dinamo Kiev 

Lazio vs Sevilla 

Fenerbahce vs Zenit St Petersburg

Sporting Lisbon vs Villarreal

BATE Borisov vs Arsenal 

Galatasaray vs Benfica 

Arsenal itamenyana na BATE Borisov na Chelsea itamenyana na Malmo ya Sweden, wakati mabingwa wa Scotland, Celtic wamepangiwa wapinzani wagumu katika hatua hii ya kwanza ya mtoano, ambao ni Valencia, ambao wameporomoka kutoka Ligi ya Mabingwa.   

Mechi nyingine za hatua hiyo Lazio, inayoshika nafasi ya tano katika Serie A, inakutana na mabingwa mara tano, Sevilla na Galatasaray watamenyana na Benfica. 

Mechi za kwanza zitachezwa Februari 12 na 14 na za marudiano zitafuatia Februari 20 na 21 mwakani.

Samatta alijiunga na KRC Genk Januari mwaka 2016 akitokea TP Mazembe ya Jamhuri ya Kidemokrasia ya Kongo (DRC) na hadi sasa amekwishacheza mechi 134 katika mashindano yote na amefunga mabao 53.

Katika Europa League Samatta amecheza mechi 22 na kufunga mabao 14, wakati katika Ligi ya Ubelgiji amecheza mechi 104 na kufunga mabao 38 na Kombe la Ubelgiji mechi nane na kufunga mabao mawili tu.

Tuesday, December 18, 2018