MARADONA AIWEKA ENGLAND PAMOJA NA TUNISIA, UBELGIJI KOMBE LA DUNIA 2018 URUSI

MAKUNDI YOTE KOMBE LA DUNIA 2018 URUSI
Kundi A; Urusi, Saudi Arabia, Misri na Uruguay 

Kundi B; Ureno, Hispania, Morocco na Iran 

Kundi C; Ufaransa, Australia, Peru na Denmark

Kundi D; Argentina, Iceland, Croatia na Nigeria 

Kundi E; Brazil, Uswisi, Costa Rica na Serbia 

Kundi F; Ujerumani, Mexico, Sweden na Korea Kusini

Kundi G; Ubelgiji, Panama, Tunisia na England 

Kundi H; Poland, Senegal, Colombia na Japan 

Gwiji wa soka wa Argentina, Diego Maradona akiinua karatasi ya England kuipanga pamoja na Ubelgiji, Tunisia na Panama katika Kundi G kwenye kombe la Dunia mwakani nchini Urusi PICHA ZAIDI GONGA HAPA

GWIJI wa soka wa Argentina, Diego Maradona ameinua karatasi ya England na kuiweka katika Kundi G kwenye Fainali za Kombe la Dunia mwakani nchini Urusi.
Katika zoezi la upangaji makundi na ratiba ya michuano hiyo lililofanyika leo Kremlin mjini Moscow, nyumbani kwa wenyeji, Urusi, England itamenyana na Ubelgiji, Tunisia na Panama kuwania kwenda hatua ya mtoano katika fainali za Kombe la Dunia mwakani Urusi.

Kundi B linakutanisha majirani, Hispania na Ureno ambao watamenyana na Iran na Morocco katika mechi za ufunguzi, wakati mabingwa watetezi, Ujerumani wamepangwa Kundi F na wataanza kutetea taji dhidi ya Mexico, kabla ya kuvaana na Sweden kisha Korea Kusini. 

Mechi ya kwanza kabisa ya Iceland katika Kombe la Dunia itakuwa dhidi ya Argentina, kufuatia timu hiyo iliyoisumbua England katika Euro 2016 kupangwa na washidi hao mara mbili wa michuano hiyo katika Kundi D. 
Nigeria imepangwa kundi hilo hilo pamoja na timu ya Lionel Messi kwa mara ya tano kwenye fainali sita. Croatia ni timu nyingine kwenye kundi hilo.

Mechi ya ufunguzi itakuwa kati ya Urusi dhidi ya Saudi Arabia mjini Moscow, ambazo zimepangwa pamoja Kundi Kundi A na Misri na Uruguay. 

Friday, December 01, 2017