KIBADENI KOCHA MPYA KILI STARS, MAKUNDI CHALLENGE YATAJWA, TANZANIA BARA YAPANGWA PAMOJA NA ZAMBIA NA ETHIOPIA

Na Prince Akbar, DAR ES SALAAM
MSHAMBULIAJI wa zamani wa kimataifa wa Tanzania na Simba SC, Alhaj Abdallah Athumani Seif ‘King Kibaden’ ameteuliwa kuwa kocha wa timu ya Tanzania Bara, Kilimanjaro Stars itakayoshiriki michuano ya Kombe la Mataifa ya Afrika Mashariki na Kati, CECAFA Challenge 2015 nchini Ethiopia.
BIN ZUBEIRY SPORTS – ONLINE inafahamu kwamba Kibadeni ambaye kwa sasa ni Mshauri wa Ufundi timu ya taifa, Taifa Stars ameshaarifiwa juu ya uteuzi huo na ameafiki.
Mshambuliaji huyo wa zamani wa Simba SC ambaye pia ni kocha wa klabu ya JKT Ruvu ya Ligi Kuu, amepewa jukumu la kuteua benchi zima la Ufundi la Taifa Stars, lakini zaidi atachukua watu kutoka benchi la Taifa Stars.

Mkongwe Mtaalamu; Alhaj Kibadeni ndiye kocha wa kikosi cha Bara, Kilimanjaro Stars

Ingizo jipya linatarajiwa kuwa mtu mmoja tu, ambaye ni Kocha Msaidizi lakini Meneja, kocha wa makipa, mtunza vifaa na Daktari watakuwa wale wale wa Taifa Stars.
Kocha Mkuu wa sasa wa Taifa Stars, Charles Boniface Mkwasa atakwenda Ethiopia kama mshauri wa Ufundi wa vikosi vyote, Bara na Zanzibar, ambayo itakuwa chini Kocha Msaidizi wa Taifa Stars, Hemed Morocco.
Michuano hiyo ambayo itaanza Novemba 21 hadi Desemba 6 mwaka huu, Kilimanjaro Stars imepangwa Kundi A pamoja na wenyeji Ethiopia, Zambia na Somalia, wakati Kundi B lina timu za Uganda, Burundi na Djibouti – huku Kundi C likiundwa na Sudan Kusini, Sudan, Zanzibar na Rwanda.

Tuesday, November 10, 2015