ZAMALEK KUIVAA PIRATES BILA NYOTA WAKE KIBAO MAJERUHI

Basem Morsi ni majeruhi

VIGOGO wa Misri, Zamalek, wanaweza kuwakosa nyota wao Basem Morsi na Ibrahim Salah katika mchezo wao wa Kombe la Shirikisho dhidi ya Orlando Pirates Jumapili.
Zamalek watakuwa wenyeji wa The Buccaneers Uwanja wa Petro Sport katika mchezo ambao utaamua kinara wa Kundi B Kombe la Shirikisho.
Lakini Zamalek italazimika kumenuana na klabu ya Afrika Kusini bila Morsi na Salah sambamba na Ali Gabr na Hazem Emam ambao pia waliumia wakiichezea timu yao ya taifa, Misri dhidi ya Chad mwishoni mwa wiki mchezo wa Kundi G kufuzu Fainali za Mataifa ya Afrika.
"Salah hataweza kucheza mechi ijayo. Anahitaji siku 15 za mapumziko, wote Basem Morsi na Hazem Emam wana nafasi nzuri ya kucheza mechi na Ali Gabr," amesema Daktari wa Zamalek, Aymen Farid.
Mchezaji mpya wa Zamalek, Mohamed Adel Gomaa imeelezwa pia ana maumivu ya enka naye hataweza kucheza dhidi ya Pirates. Zote Zamalek na Orlando Pirates tayari zimefuzu Nusu Fainali na Jumapili zitagombea kumaliza kileleni mwa Kundi B.

Thursday, September 10, 2015