YANGA SC YAACHANA NA DILUNGA ‘KWA HERI’, KIKOSI CHAENDELEA NA MAKAMUZI MBEYA

Na Mahmoud Zubeiry, DAR ES SALAAM

YANGA SC imeachana na kiungo wake Hassan Dilunga, ambaye anahamia Stand United ya Shinyanga.

Katibu wa Yanga SC, Dk. Jonas Tiboroha ameiambia BIN ZUBEIRY SPORTS- ONLINE asubuhi ya leo kwamba, wamefikia makubaliano na mchezaji huyo aliyesajiliwa msimu uliopita kutoka Ruvu Shooting kuvunja Mkataba bila masharti.

Hassan Dilunga sasa si mchezaji wa Yanga SC tena

WALIOTOKA NA KUINGIA YANGA SC 

Waliotemwa; Hassan Dilunga, Nizar Khalfan, Danny Mrwanda, Said Bahanuzi, Hamisi Thabit, Omega Seme na Jerry Tegete.

Walioondoka; Mrisho Ngassa (Free State, A. Kusini) na Kpah Sherman (Blac Aces. A. Kusini)

Wapya; Mudathir Khamis (KMKM), Benedicto Tinocco (Kagera Sugar), Mwinyi Hajji Mngwali (KMKM), Deus Kaseke (Mbeya City), Matheo Anthony Simon (KMKM), Godfrey Mwashiuya (Kemondo), Malimi Busungu (Mgambo JKT), Vincent Bossou (Togo), Donald Ngoma (Zimbabwe) na Thabani Kamusoko (Zimbabwe).

Mkopo; Edward Charles (JKT Ruvu), Hussein Javu (Mtibwa Sugar) na Rajab Zahir (Stand United).

“Dilunga tumeachana naye moja kwa moja, tulitaka kumtoa kwa mkopo, yeye akataka tuvunjiane Mkataba bila masharti. Tumemkubalia na tumevunja Mkataba naye,”amesema Dk. Tiboroha.

Aidha, Tiboroha amesema kwamba beki Edward Charles amerudishwa JKT Ruvu kucheza kwa mkopo wa miezi sita hadi Desemba, wakati pia kuna uwezekano Hussein Javu akarudishwa Mtibwa kwa mkopo na beki Rajab Zahir akaenda kucheza kwa mkopo Stand United.

Wachezaji waliotemwa Yanga SC baada ya kumaliza mikataba yao ni Nizar Khalfan, Danny Mrwanda, Said Bahanuzi, Hamisi Thabit, Omega Seme na Jerry Tegete, wakati Mrisho Ngassa na Kpah Sherman wameondoka.

Ngassa amehamia Free State Stars na Sherman amehamia Mpumalanga Blac Aces, zote za Ligi Kuu ya Afrika Kusini. 

Wachezaji wapya waliosajiliwa Yanga ni; Mudathir Khamis, Benedicto Tinocco, Mwinyi Hajji Mngwali, Deus Kaseke, Matheo Anthony Simon, Godfrey Mwashiuya, Malimi Busungu, Vincent Bossou, Donald Ngoma na Thabani Kamusoko.

Tiboroha amesema kwamba kikosi cha Yanga SC kinaendelea na kambi yake Tukuyu mjini Mbeya na kinatarajiwa kurejea kesho jioni Dar es Salaam kwa maandalizi ya mwisho ya mchezo wa Ngao ya Jamii dhidi ya Azam FC mwishoni mwa wiki.

Kikosi cha Yanga SC kinaendelea na mazoezi mjini Mbeya na kinatarajiwa kurejea Dar es Salaam kesho jioni

Tuesday, August 18, 2015