CHAZ BABA ASIMAMISHWA KAZI MWEZI MZIMA MASHUJAA BAND

Chaz Baba kulia akiwa na mshambuliaji wa Yanga SC, Simon Msuva kushoto 

MWIMBAJI tegemeo wa Mashujaa Band, Chaz Baba (pichani kulia)  amesimamishwa kazi kwa mwezi mzima baada ya kukithiri kwa kukiuka kwake miiko ya kazi kwa mujibu wa mkataba wake. 
Saluti5 imeandika kwamba mwimbaji huyo amekuwa akitoroka mara kwa mara kwenye maonyesho ya Mashujaa Band na kwenda kuibukia katika maonyesho ya bendi nyingine. Jumamosi iliyopita Chaz Baba aliibukia katika onyesho la Twanga Pepeta ndani ya Mango Garden licha ya kupewa tahadhari mapema na mwajiri wake kuwa asijihusishe na show hiyo iliyokuwa imealika wasanii kadhaa wa zamani wa Twanga Pepeta. Habari za ndani za Mashujaa Band zinadai Chaz Baba amesimamishwa kazi tangu juzi ambapo onyesho hilo la Twanga Pepeta ni moja ya sababu. Saluti5 ilipomtafuta kwa njia ya simu mkurugenzi wa masoko wa Mashujaa, Maxi Luhanga alikuwa na majibu mafupi kama hivi: “Hilo ni suala la kiofisi, siwezi kukanusha wala kukubali.” Hata hivyo Chaz Baba ameihakikishia Saluti5 kuwa ni kweli amesimamishwa kazi. “Ni kweli nimesimamishwa, nitakuja tuongee ana kwa ana, lakini habari hizo ni za kweli,” alisema Chaz Baba kwa njia ya simu.

Thursday, August 13, 2015