EL MERREIKH YAPIGWA 1-0 NA USM ALGIER LIGI YA MABINGWA

El Merreikh ilianza safari yake kwa kuitoa Azam FC ya Tanzania kwa jumla ya mabao 3-2 ikifungwa 2-0 Dar es Salaam na kwenda kushinda 3-0 Khartoum

KLABU ya USMA Alger imeifunga El Merreikh ya Sudan bao 1-0 Uwanja wa Omar Hamadi mjini Algiers jana katika mchezo wa Kundi B Ligi ya Mabingwa Afrika 2015.
Timu hiyo ya Algeria sasa inajitanua kileleni kwa kundi hilo kwa kufikisha pointi sita baada ya mechi mbili, kufuatia kuwafunga pia mabingwa watetezi, ES Setif mwezi uliopita.
El Merreikh wanabaki nafasi ya pili, ingawa wanaweza kushuka baada ya matokeo ya mchezo kati ya Setif na MC El Eulma, zinazomenyana leo.
Bao pekee la USMA katika mchezo huo lilifungwa na mshambuliaji wa zamani wa Esperance ya Tunisia, Youcef Belaili kipindi cha pili.
Ikumbukwe El Merreikh ilianza safari yake kwa kuitoa Azam FC ya Tanzania katika Raundi ya Kwanza kwa jumla ya mabao 3-2 ikifungwa 2-0 Dar es Salaam na kwenda kushinda 3-0 Khartoum.
Michuano hiyo itaendelea tena wikiendi ya kati ya Julai 24 na 26 baada ya wikiendi hii, USMA itamenyana na MC El Eulma, wakati El Merreikh wataifuata ES Setif.

Saturday, July 11, 2015