KOPUNOVIC ALIVYOWAFANYIA ‘UJASUSI’ COASTAL UNION MKWAKWANI LEO

Na Mahmoud Zubeiry, TANGA 

KOCHA wa Simba SC, Mserbia Goran Kopunovic leo alikuwa Uwanja wa Mkwakwani, Tanga kushuhudia mchezo wa Ligi Kuu ya Vodacom Tanzania Bara kati ya wenyeji Coastal Union dhidi ya Yanga SC ya Dar es Salaam.

Yanga SC ilishinda 1-0, bao pekee la Nahodha Nadir Haroub Ali ‘Cannavaro’ na Simba SC ndiyo wapinzani wafuatao wa Coastal Union Jumamosi Uwanja wa Mkwakwani.

Kocha wa Simba SC, Goran Kopunovic akiwa Uwanja wa Mkwakwani, Tanga leo kuwaangalia Coastal Union wakimenyana na Yanga SC

REKODI YA KOPUNOVIC SIMBA SC 

Simba SC 1-0 Mafunzo (Kombe la Mapinduzi)

Simba SC 1-0 JKU (Kombe la Mapinduzi)

Simba SC 4-0 Taifa Jang’ombe (Robo Fainali Kombe la Mapinduzi)

Simba SC 1-0  Polisi (Nusu Fainali Kombe la Mapinduzi)

Simba SC 0-0  Mtibwa Sugar (Simba ilishinda penalti 4-3 Fainali Kombe la Mapinduzi)

Simba SC 2-0  Ndanda FC (Ligi Kuu)

Simba SC 1-1 Azam FC (Ligi Kuu)

Simba SC 1-2 Mbeya City (Ligi Kuu Taifa)

Simba SC 2-1 JKT Ruvu (Ligi Kuu)

Na kwa sababu hiyo, Kopunovic alihitaji kuwajua wapinzani wake kabla ya kukutana nao Jumamosi na alifika uwanjani mapema tu leo hata kabla timu hazijaingia kupasha misuli moto.

Lakini Goran hakutaka kuonekana na wengi kama yupo Mkwakwani, kwani ‘alijibanza’ nyuma ya wazee wawili, akawa anachungulia kwa ‘kuibia ibia’ huku akiandika taarifa alizohitaji.

Koponuvic anaonekana kupania kuchukua pointi tatu Uwanja wa Mkwakwani Jumamosi na kikosi chake kilitarajiwa kuwasili leo Tanga, ili kesho kianze kujifua mjini hapa.

Akitoka kushinda mabao 2-1 dhidi ya JKT Ruvu Jumamosi Uwanja wa Taifa, Dar es Salaam Mserbia huyo anahitaji pointi tatu zaidi mwishoni mwa wiki Mkwakwani.      

Katika mechi nne za Ligi Kuu, ambazo Goran ameiongoza Simba SC, ameshinda mbili dhidi ya Ndanda FC 2-0 mjini Mtwara na 2-1 dhidi ya JKT Ruvu, wakati amefungwa 2-1 Mbeya City na kutoa sare ya 1-1 na Azam FC.   

Kwa ujumla, Kopunovic ameiongoza Simba SC katika mechi tisa, zikiwemo tano za Kombe la Mapinduzi, ambazo alishinda zote na kuipa timu taji hilo.

Hapa Goran anaandika taarifa muhimu alizohitaji kuhusu Coastal Union

Kopunovic akiwatazama kwa makini wapinzani wa Jumamosi

Wednesday, February 04, 2015