REFA POLISI KUCHEZESHA YANGA NA AZAM KESHO TAIFA

Na Boniface Wambura, Dar es Salaam
REFA ambaye ni askari wa jeshi la Polisi Tanzania, Hashim Abdallah wa Dar es Salaam ndiye atakayechezesha mechi ya Ligi Kuu ya Vodacom Tanzania Bara kati ya Yanga na Azam itakayochezwa kesho Uwanja wa Taifa, Dar es Salaam kuanzia saa 10.30 jioni.
Hashim atasaidiwa na Anold Bugado wa Singida, Florentina Zablon wa Dodoma na Lulu Mushi wa Dar es Salaam, wakati Kamisaa atakuwa Emmanuel Kavenga kutoka Mbeya na mtathimini wa waamuzi ni Alfred Rwiza wa Mwanza.

Unaikumbuka hii? Refa Hashim Abdallah akisindikizwa na askari Polisi wenzake baada ya mechi kati ya Yanga na Azam mzunguko wa pili msimu uliopita. Wachezaji wa Azam walimvamia refa huyo baada ya mechi hiyo Februari 23,mwaka jana Yanga ikishinda 1-0 wakimtuhumu kuwapendelea wapinzani wao.

Wachezaji wa Azam wakimzonga Hashim Abdallah katika mchezo huo

Tiketi kwa ajili ya mechi hiyo zitaanza kuuzwa saa 2 asubuhi katika magari maalumu kwenye vituo vya Shule ya Sekondari Benjamin Mkapa, Ubungo Terminal, mgahawa wa Steers uliopo Mtaa wa Samora/Ohio, OilCom Ubungo, Buguruni Shell, Dar Live- Mbagala, kituo cha daladala Mwenge na Uwanja wa Taifa.
Baada ya Saa 6:00 mchana mauzo yote yatahamia Uwanja wa Taifa ambapo milango kwa ajili ya mechi itakuwa wazi kuanzia saa 7.30 mchana.
Viingilio katika mechi hiyo vitakuwa sh. 30,000 kwa VIP A, sh. 20,000 kwa VIP B na C wakati viti vya rangi ya chungwa, bluu na kijani kiingilio ni sh. 7,000.

Hashim akichezesha mechi hiyo Februari 23 mwaka jana, hapa Salum Abubakar 'Sure Boy' anawatoka wachezaji wa Yanga SC

Tuesday, March 18, 2014