MTOTO WA MATUMLA KUZIPIGA NA FRANCIS MIYEYUSHO AMLIPIE KISASI BABA YAKE

Na Prince Akbar, Dar es Salaam
FRANCIS Miyeyusho alimpiga vibaya Mbwana Matumla na kumpoteza kwenye ramani ya  ngumi, lakini sasa unajua kinachofuata. Ni bonge la hadithi.
Mbwana ni mdogo wa Rashid Matumla na wote waliwika pamoja katika ngumi za kulipwa muongo uliopita na kaka yake huyo ana watoto wawili waliofuata nyayo zake ulingoni, ambao ni Mohamed ‘Muddy’ na Daudi.
Muddy Matumla tayari ni bondia maarufu sasa nchini na kijana huyo ameamua kujaribu kumlipia kisasi baba yake mdogo baada ya jana kusaini Mkataba wa kupambana na Chichi Mawe Aprili 26, mwaka huu katika ukumbi wa PTA Sabasaba, Dar es Salaam.

Pambano la kisasi; Muddy Matumla kulia akiwa na Francis Miyeyusho baada ya kusaini Mkataba jana mjini Dar es Salaam kwa ajili ya kuzipiga Aprili 26,mwaka huu.

Muulize baba yako mdogo; Miyeyusho kushoto akitunishiana misuli na Muddy Matumla, huku Rashid Matumla kulia akiwatazama jana

Pata picha, hilo ni pambano la kukosa? Kama kweli unapenda ngumi hupaswi kulikosa pambano hilo.
Promota wa pambano hilo ni Ally Mwazoa, ambaye jana alisema ameingia nao mkataba mabondia hao na mara moja wataanza maandalizi ya pambano lao.
“Nitaendeleza ubabe katika familia ya Matumla, nitamchakaza huyu dogo kama nilivyomfanya baba yake mdogo ,”alisema Chichi Mawe ambaye alicheza mara tatu na Mbwana akipigwa mapambano mawili ya kwanza kabla ya kushinda la mwisho lililomuondoa kabisa ulingoni Golden Boy wa Tanzania.
Muddy Matumla alijibu; “Mimi ninamuheshimu Miyeyusho, kwa kuwa yeye ni mkubwa kiumri kwangu na mzoefu, lakini pamoja na hayo, naahidi kumpa kichapo kikali kama nilivyomfanya mdogo wake Doi Miyeyusho,”alisema.
Muddy alimpiga mara mbili mdogo huyo wa Francis, mara ya kwanza kwa Knockout (KO) Raundi ya pili ukumbi wa DDC Keko na mara ya pili kwa KO pia Raundi ya pili ukumbi wa PTA.
Pamoja na pambano hilo, kutakuwa na mapambano ya utangulizi, likiwemo kati ya Lulu Kayage na Halima Ramadhani upande wa wanawake.

Friday, March 14, 2014