%202.png)
.png)
 |
| Juma Nyosso; Beki mtarajiwa Libolo |
Na Mahmoud Zubeiry
KLABU ya Recreativo de Libolo inataka kununua wachezaji wawili wa Simba SC, beki Juma Said Nyosso na kiungo mshambuliaji, Mrisho Khalfan Ngassa, lakini dili hilo imeliweka kiporo kwanza.
Mwenyekiti wa Kamati ya Usajili ya Simba SC, Zacharia Hans Poppe ameiambia BIN ZUBEIRY leo kwamba, Libolo imefanya mazungumzo ya awali na klabu yake, lakini dili hilo litachukua muda kidogo.
“Baada ya mechi tu, wao wamekwenda tena Ureno kujiandaa na hatua inayofuata. Na kwa sababu muda wa usajili bado, wamesema wataendelea kufanya mawasiliano na sisi kwa ajili ya kutekeleza mpango huo baadaye,”alisema Hans Poppe.
Kapteni huyo wa zamani wa Jeshi la Wananchi Tanzania (JWTZ), amesema kwamba Simba ipo tayari kuwauza nyota wake hao, iwapo watafikia makubaliano.
“Hata wachezaji wenyewe tumekwishawaambia juu ya mpango huo, na wameufurahia, sasa tunavuta subira, mambo yakiwa mazuri biashara itafanyika,”alisema Poppe, ambaye pia ni Mjumbe wa Kamati ya Utendaji Simba.
Simba imetolewa katika Ligi ya Mabingwa Afrika kwenye Raundi ya Kwanza tu, baada ya kufungwa jumla ya mabao 5-0 na Libolo, ikifungwa 1-0 Dar es Salaam na baadaye 4-0 Calulo, Angola.
Pamoja na kutolewa, Wekundu hao wa Msimbazi wapo kwenye nafasi ya kuendeleza desturi yao ya kuuza wachezaji kila baada ya kuaga michuano hiyo katika miaka ya karibuni.
Mwaka juzi, baada ya kutolewa iliwauza Mbwana Samatta na Mganda Patrick Ochan kwenda TP Mazembe ya DRC na Mussa Hassan Mgosi kwenda DC Motema Pembe ya nchini humo pia, wakati mwaka huu imemuuza Mganda Emmanuel Okwi kwenda Etoile du Sahel ya Tunisia.
