NI SIMBA NA AZAM, TUSKER NA MIEMBENI NUSU FAINALI MAPINDUZI

Beki Salvatory Ntebe wa Mtibwa Sugar akipiga mpira kichwani kwa mshambuliaji wa Azam, gaudence Mwaikimba katika mchezo wa leo wa Kundi B, Kombe la Mapinduzi, Uwanja wa Amaan, Zanzibar. Timu hizo zilitoka 0-0.

Na Mahmoud Zubeiry, Zanzibar

SIMBA SC itamenyana na Azam FC katika Nusu Fainali ya Kombe la Mapinduzi Januari 10, mwaka huu kwenye Uwanja wa Amaan, Zanzibar.

Hiyo inafuatia Azam kutoka sare ya bila kufungana na Mtibwa Sugar usiku huu kwenye Uwanja wa Amaan visiwani hapa, katika mchezo wa mwisho wa Kundi B la michuano hiyo.  

Azam imemaliza na pointi tano na kuongoza Kundi B, ikifuatiwa na Miembeni iliyomaliza na pointi nne.

Miembeni itamenyana na kinara wa Kundi A, Tusker ya Kenya keshokutwa katika Nusu Fainali ya kwanza.

Katika mchezo wa leo, Azam ikiongozwa na washambuliaji wawili, Gaudence Mwaikimba aliyekuwa katikati na Brian Umony aliyekuwa akishambulia kutokea pembeni ililitia misukoko miwili mitatu lango la Mtibwa, lakini leo kipa Hussein Sharrif ‘Casillas’ alisimama imara kwa dakika zote 90 na kuokoa hatari zote.

Mtibwa iliyocheza na washambuliaji wawili pia, Hussein Javu na Juma Zuilio ililitia misukosuko pia lango la Azam, lakini Mwadini Ally kipa wa Azam alikuwa makini kuokoa hatari zote.

Azam FC; Mwadini Ally, Himid Mao, Samih Haji Nuhu, David Mwantika, Jockins Atudo, Michael Bolou, Brian Umony/Seif Abdallah dk70, Salum Aboubakar, Gaudence Mwaikimba, Humphrey Mieno na  Khamis Mcha ‘Vialli’/Uhuru Suleiman dk47.

Mtibwa Sugar;Hussein Sharif, Khamis Issa, Yusuf Nguya, Rajab Mohamed, Salvatory Ntebe, Babu Ally Seif, Vincent Barnabas, Rashid Gumbo, Hussein Javu, Juma Zuilio na Ally Mohamed.

Monday, January 07, 2013