BAADA YA UTURUKI, OMAN NA KENYA SASA TUNATAKA UFUNDI WA SOKA SI KUNUNUA MECHI

Na Bin Zubeiry

WAKATI tunaelekea ukingoni mwa mzunguko wa kwanza wa Ligi Kuu ya Vodacom Tanzania Bara, wachezaji wanne wa klabu ya Azam FC walisimamishwa na klabu yao kwa muda usiojulikana kwa tuhuma zilizowekwa wazi, za kuihujumu timu hiyo katika mechi dhidi ya Simba SC.

Azam walisema hivyo, ingawa hadi leo wameshindwa kuthibitisha madai yao na wachezaji hao tangu wakati huo hawajahusishwa katika programu yoyote ya timu hiyo.

Hao ni kipa Deo Munishi ‘Dida’ na mabeki Aggrey Morris aliyekuwa Nahodha, Erasto Nyoni na Said Mourad.

Hizi ni habari za kawaida sana kusikia katika soka ya Tanzania, mchezaji kahujumu mechi imekuwa sehemu ya maisha ya kila siku katika mpira wetu.

Ukitazama kwa undani sana, utagundua haya mambo hayazungumzwi hivi hivi tu, ni kweli yapo katika soka yetu na msimu uliopita yalitawala sana.

Mbaya zaidi, kuna wakati hata watu wa klabu moja wanaweza kuhujumiana wao wenyewe, kwa kuwahonga fedha wachezaji wao wacheze chini ya kiwango ili watimize malengo, kama kuung’oa uongozi uliopo madarakani na kadhalika.

Wakati haya yanaendelea, tunashuhudia soka yetu ikizidi kudidimia kila siku na mifano iko wazi, kwamba sasa shabiki wa soka wa Tanzania hana ndoto ya kushuhudia mafanikio ambayo klabu zefu zilipata miaka ya nyuma.

Mara ya mwisho Simba SC kufanya vizuri katika michuano ya Afrika ilikuwa mwaka 2003 walipofuzu kucheza hatua ya makundi, wakati kwa wapinzani wao, Yanga ilikuwa mwaka 1998.

Azam ni timu ngeni na ingawa imo kwenye mbio za ubingwa kwa misimu mitatu sasa, lakini bado inapewa muda kulingana na uchanga wake.

Timu zote tatu zilizo katika mbio za ubingwa, zimekuwa zikihusishwa katika mchezo mchafu. Simba wananawashika uchawi Azam na Yanga, Azam wanawashika uchawi Simba na Yanga, Yanga wanawashika uchawi Azam na Simba.

Huo ndio umekuwa mwenendo wa soka yetu katika miaka ya karibuni, ingawa mizizi ya haya mambo ilianzia wakati ule mwanzoni mwa miaka ya 1990, wafanyabiashara wenye asili ya Kiasia walipovamia kwa kasi katika klabu hizi.

Mwishoni mwa miaka ya 1990 walitoweka na kidogo soka yetu ikaanza kujiumba upya, lakini ghafla yamerudi tena, tena kwa kasi na mafundi ni sisi wenyewe tunaojiita wazalendo.

Ukweli ni kwamba, kama kweli tunaipenda soka yetu lazima tupambane na rushwa ili kumlinda mchezaji na soka yetu kwa ujumla. Tukatazane kushawishi wachezaji kwa hongo na tuhimizane kucheza soka kwa matokeo halisi ya uwanjani.

Wakati hatua ya lala salama ya Ligi Kuu ya Vodacom Tanzania inaanza mwishoni mwa wiki, timu zote tatu zilizo katika mbio za ubingwa zinaonekana kuwa na maandalizi mazuri.

Yanga walikwenda kambini Uturuki kwa wiki mbili, ambako pamoja na kujifua ufukweni, gym na uwanjani, walipata mechi tatu za kujipima nguvu.

Katika mechi hizo tatu, dhidi ya Ariminia Bielefed ya Daraja la Nne Ujerumani waliyotoka nayo sare ya 1-1, kabla ya kufungwa 2-1 na Denizlispor FC ya Daraja la Kwanza Uturuki na 2-0 na Emmen FC ya Daraja la Kwanza Uholanzi.

Na waliporejea, walipata mchezo wa kujipima nguvu dhidi ya Black Leopard ya Afrika Kusini na kushinda mabao 3-2, Uwanja wa Taifa, Dar es Salaam. Leo tena wanarudiana na Leopard Uwanja wa Kirumba, Mwanza.

Ikumbukwe Yanga ilimaliza mzunguko wa kwanza wa Ligi Kuu, ikiwa inaongoza ligi hiyo kwa pointi zake 29, baada ya kucheza mechi 13, ikifuatiwa na Azam iliyomaliza na pointi zake 24 na mabingwa watetezi, Simba SC waliomaliza na pointi 23.

Azam wanarejea leo kutoka Kenya, ambako walicheza mechi tatu za kujipima nguvu, dhidi ya timu ya Benki ya Biashara Kenya, KCB waliyoifunga bao 1-0 sawa na Sofapaka wakati mchezo wake wa kwanza, mabingwa hao wa Kombe la Mapinduzi walifungwa mabao 2-1 na AFC Leopard.

Awali ya hapo, Azam walikwenda Jamhuri ya Kidemokrasia ya Kongo (DRC) ambako walicheza Kombe la Hisani na kufanikiwa kulitwaa. Waliporudi, wakaenda Zanzibar kwenye Kombe la Mapinduzi, ambako walicheza na kushinda taji hilo.

Simba SC inarejea leo kutoka Oman ilipoweka kambi ya wiki mbili na kupata mechi tatu za kujipima nguvu, wakishinda moja dhidi ya Ahly Sidab mabao 2-1 na kufungwa mbili, 2-1 dhidi ya U23 ya Oman na 3-1 dhidi ya timu ya Jeshi la nchi hiyo, Qaboos.

Kesho watacheza na Black Leopard Taifa. Awali ya hapo, Simba SC ilikwenda Zanzibar kwenye Kombe la Mapinduzi, ambako walitolewa katika Nusu Fainali na Azam kwa mikwaju ya penalti, baada ya sare ya 2-2 ndani ya dakika 120.

Ukizungumzia maandalizi, hakika timu zote tatu zilizo katika mbio za ubingwa zimejiandaa vema na zimeonyesha dhamira ya kushindania ubingwa. Timu zote zina makocha wa kigeni, tena Wazungu ambao tunaamini ndio bora.

Makocha hawa wanalipwa fedha nyingi. Timu zote zimesajili wachezaji bora hadi wa kigeni, tena ambao wana namba kwenye vikosi vya timu zao za taifa. Wachezaji wote wana mikataba ya malipo mazuri. Wanalipwa vizuri.

Baada ya haya yote haya, dhahiri mashabiki wa soka nchini na wadau kwa ujumla wanasubiri kushuhudia ushindani halisi, utakaotokana na namna ambavyo timu ziliwekeza katika maandalizi.

Tunataka kuona wachezaji na makocha wanaitumikia mishahara na marupurupu yao uwanjani na si kusikia eti, mchezaji fulani alihongwa akafungisha. Hapana. Wakati umefika sasa, tuachane na haya mambo na tucheze soka.

Kuna faida gani kuwa na kocha wa kigeni, wachezaji watano wa kigeni, na hata wa hapa hapa, kuchagua wale walio bora na kuwalipa vizuri, halafu unakwenda kuhonga mchezaji wa timu pinzani ili ushinde? 

Nafurahia sana ujio wa Bodi ya Ligi Kuu yenye sura na dira mpya, nitasema nao wakikamilisha mambo yao, ila kwa sasa naomba niwasihi hawa farasi watatu wanaofukuzana kwenye mbio za ubingwa, Azam, Simba na Yanga, tunataka kushuhudia walichovuna katika maandalizi yao, na si ufundi wa kununua mechi. Alamsiki.

Wednesday, January 23, 2013