WANYONGE STARS WAREJEA LEO

Makocha wa Stars, Kim Poulsen na msaidizi wake Sylvester Marsh 

Na Mahmoud Zubeiry

TIMU ya taifa ya Bara, Kilimanjaro Stars iliyokuwa inashiriki michuano ya Kombe la Mataifa ya Afrika Mashariki na Kati, CECAFA Tusker Challenge mjini Kampala, Uganda, inarejea Dar es Salaam leo Jumapili baada ya kuambulia nafasi ya nne.

Stars iliyotolewa katika Nusu Fainali na mabingwa mara mbili mfululizo, Uganda, The Cranes kwa kuchapwa mabao 3-0, jana ilifungwa tena kwa penalti 6-5 na Zanzibar katika mchezo wa kusaka nafasi ya tatu, Uwanja wa Mandela, Namboole mjini Kampala kufuatia sare ya 1-1.

Timu hiyo itatua Uwanja wa Ndege wa Kimataifa wa Julius Nyerere (JNIA) saa 11:00 kamili jioni kwa ndege ya PrecisionAir.

Baada ya Kilimanjaro Stars na Zanzibar Heroes kumaliza kushiriki mashindano ya Kombe la Challenge mjini Kampala, Kocha Mkuu wa Taifa Stars, Kim Poulsen kesho Jumatatu (Desemba 10, 2012) saa 6 kamili mchana ofisi za Shirikisho la Mpira wa Miguu Tanzania (TFF) atatangaza kikosi chake kitakachoingia kambini jioni ya Desemba 12, 2012 jijini Dar es Salaam kujiandaa kwa mechi ya kirafiki dhidi ya mabingwa wa Afrika, Zambia (Chipolopolo) itakayofanyika Desemba 22, 2012 katika Uwanja wa Taifa.

Sunday, December 09, 2012