SELEMBE AWAPA MALARIA + WAKENYA, TAZAMA REKODI YA HARAMBEE NA HEROES TANGU 1977

Kikosi cha Zanzibar, Selembe wa kwanza kushoto walioinama, kiboko ya Wakenya 

Na Mahmoud Zubeiry, Kampala

KIUNGO wa Zanzibar, Suleiman Kassim ‘Selembe‘ ndiye mchezaji ambaye anawatia hofu mno Wakenya kuelekea mchezo wa leo wa Nusu Fainali ya Kombe la Mataifa ya Afrika Mashariki na Kati, CECAFA Tusker Challenge Uwanja wa Mandela, Namboole, mjini hapa.

Mashabiki wa soka wa Kenya waliopo hapa na baadhi ya Waandishi wa Habari kutoka nchini humo, wamekuwa wakimzungumzia Selembe kama mchezaji hatari na aliyebeba hatima yao leo.  

“Selembe, yule mchezaji yupo kama Fellaini (Marouane) ni hatari sana yule, kwa kweli amebeba hatima yetu, tukiweza kumbana yule, Zanzibar wala hawafurukuti,”alisema mmoja wa mashabiki wa Kenya juzi mjini hapa, akimfananisha kiungo huyo na kiungo wa kimataifa wa Ubelgiji mwenye asili ya Morocco, anayechezea Everton ya England.

Kenya na Zanzibar zinamenyana katika Nusu Fainali ya kwanza kwenye Uwanja wa Mandela leo, mchezo ambao utafuatiwa na mechi nyingine kati ya Uganda na Tanzania Bara.

Kenya wanaonekana kuihofia mno Zanzibar kiasi cha kuthubutu kuwarejesha kambini wachezaji wake wawili iliyowarudisha nyumbani kwa utovu wa nidhamu, Paul Were na Kevin Omondi.

Baada ya kuifunga 1-0 Sudan Kusini katika mchezo wa pili wa Kundi A, wachezaji hao walikwenda kujirusha kwenye klabu ya usiku na kurejea kambini na wanawake, jambo ambalo lilifanya asubuhi yake wapandishwe ndege wote kurejea Nairobi, lakini kutokana na mchecheto wa mechi ya kesho, wamerejeshwa.

Kocha wa Harambee Stars, James Nandwa aliliomba Shirikisho la Soka Kenya (FKF) liliwarejeshe wachezaji hao kwa ajili ya Nusu Fainali.

Kocha wa Fisa FC, Charles ‘Korea’ Omondi, ambaye amekuwa akifanya mazoezi na wachezaji hao tangu warejeshwe nyumbani, amethibitisha wamebadilika kinidhamu na wako vizuri kimchezo.

Were na Omondi wapo kwa mkopo AFC Leopards na Gor Mahia kutoka timu inayoshiriki Ligi ya Jimbo la Nairobi, Fisa FC.

Mara ya kwanza na ya mwisho timu hizi kukutana katika hatua ya mtoano ilikuwa ni mwaka 1979 nchini Kenya, katika Nusu Fainali na wenyeji walishinda 2-0 Novemba 14 Uwanja wa Nyayo, Nairobi na mara zote zimekuwa zikikutana katika hatua ya makundi.

Na mara ya mwisho kabisa kukutana katika mashindano haya timu hizi ilikuwa ni mwaka 1996 nchini Sudan na Kenya ilishinda 1-0.

Kwa ujumla, timu hizi zimekutana mara 11 tangu kuanzishwa rasmi kwa michuano ya Challenge mwaka 1974 na Kenya imeshinda mechi saba, sare tatu na imefungwa moja. Kenya imeifunga Zanzibar jumla ya mabao 17, wakati yenyewe imefungwa saba.

                 

REKODI YA KENYA NA ZANZIBAR CHALLENGE

                   P    W  D   L    GF GA Pts

Kenya         11   7    3    1    17 7    24

Zanzibar     11   1    3    7    7   17   6

REKODI YA KENYA NA ZANZIBAR TANGU 1977:

Novemba 24, 1996; Sudan Kundi B

Kenya 1-0 Zanzibar

Novemba 27,  1995; Uganda Kundi A

Kenya 2-0 Zanzibar

Novemba 30, 1991; Kundi B Uganda

Kenya 3-2 Zanzibar

Desemba 6, 1989; Kundi B Kenya 

Zanzibar 0-0 Kenya B

Desemba 14, 1987; Kundi A Ethiopia

Kenya 0-0 Zanzibar

Desemba 6, 1984; Kundi B Uganda

Kenya 1-0 Zanzibar

Novemba 21, 1982; Kundi B Uganda

Kenya 2-2 Zanzibar

Novemba 17, 1981; Kundi A Tanzania

Kenya 2-1 Zanzibar

Novemba 22, 1980; Kundi B Sudan

Kenya 1-2 Zanzibar

Novemba 14, 1979; Nusu Fainali Kenya  

Kenya 2-0 Zanzibar

Desemba 2, 1977; Kundi A Somalia

Kenya 3-0 Zanzibar

Thursday, December 06, 2012