DAR ES SALAAM INAWEZA KUWA NA VIWANJA KAMA LUGOGO VINGI TU

Kijukwaa cha VIP cha Lugogo, nyuma yake kuna kanyumba ka kukabadilishia nguo wachezaji

KUFUATIA mvua mfululizo zilizonyesha mjini Kampala, Uganda wiki hii, Baraza la Vyama vya Soka Afrika Mashariki na Kati (CECAFA) liliamua kuzihamishia baadhi ya mechi za michuano ya CECAFA Tusker Challenge kutoka Uwanja wa Mandela, Namboole, hadi Lugogo.

Lengo la kufanya hivyo ni kuupumzisha Uwanja wa Namboole, ambao ulikwishakuwa na hali mbaya kutokana na mvua hizo.

Na Mahmoud
Bin Zubeiry

Wakati wa Mkutano na Waandishi wa Habari kutangaza mabadiliko hayo, Katibu wa CECAFA, Nicholas Musonye alijikuta kwenye wakati mgumu kwa maswali ya wana Habari, waliohoji kwa nini mashindano yapelekwe kwenye viwanja vya uchochoroni.

Waandishi wa kigeni waliishambulia Uganda kwamba haikuwa na sifa za kupewa uenyeji wa mashindano hayo, kwa sababu baada ya Namboole kuharibika kwa mvua, Uwanja mwingine, Nakivubo nao upo katika ukarabati.

Wakati akishambuliwa kwa maswali, Ofisa Habari wa Shirikisho la Soka Uganda (FUFA), Rodgers Mulindwa alisema kwamba wanakabiliwa na tatizo ambalo ni kutokuwa na viwanja.

Mulindwa alisema kwamba, FUFA haina Uwanja, viwanja vyote ni mali ya serikali, hivyo hawana mamlaka navyo.

Hiyo ni hali ambayo inalikabili hata Shirikisho la Soka Tanzania (TFF), viwanja vyote nchini ni mali ya serikali na CCM, chama tawala. Tuachane na hayo- kikubwa kilichonivutia ni baada ya kuhamishiwa kwa mechi 

Askari wakilinda moja ya maageti ya Uwanja huo

Mashabiki wanakula bia zao za kopo huku mechi ikiendelea

hizo kwenye viwanja vidogo vidogo kama huo wa Lugogo, uliopo mjini tu.

Ni Uwanja ambao kwa mechi ambazo hazina mashabiki wengi, unafaa mno. Wakati nikishuhudia mchezo kati ya Tanzania Bara na Somalia na baadaye Rwanda na Eritrea kwenye Uwanja huo jana, pia nilikuwa nikizungusha shingo yangu kuutazama vizuri.

Nilirudisha hisia zangu Dar es Salaam na kuvitafakari viwanja kama TCC pale Chang’ombe, Leaders Club, Kinesi, Tandika Mabatini, Bandari au pale palipokuwa panaitwa Kidongo Chekundu, Mnazi Mmoja.

Uwanja wa Lugogo, umezungushiwa seng’enge ya uzio wa kutenganisha mashabiki na eneo la kuchezea mpira. Una kijukwaa fulani kidogo tu upande mmoja. Una jengo dogo la vyoo na vyumba vya kubadilishia nguo kwa timu.

Kali kuliko yote, una nyasi nzuri zilizopendeza zinazofaa mno kuchezea kandanda. Niliupenda. Nilipoutazama mara mbili mbili ukubwa wake, sikuona tofauti yeyote na viwanja vya Dar es Salaam nilivyovitaja hapo juu.

Angalia mashabiki nyuma ya goli kabisa

Viti vya kukalia wachezaji wa akiba

Dar es Salaam kuna kilio kikubwa cha makato ya mapato ya milangoni kwa mechi zinazochezwa kwenye Uwanja wa Taifa, ambao ni mali ya serikali na kwa sababu hiyo, baadhi ya timu za mjini zinalazimika kwenda kuchezea mechi zake nje kabisa ya mji kwa kuwa hazina uwezo wa kufidia gharama za Uwanja wa Taifa.

Na watu wenye kupenda soka, wanashindwa kuzifuata timu hizo nje ya mji, kwa sababu ni mbali wanahofia muda na gharama.

Najaribu kutafakari, kama Ilala itakuwa na viwanja vidogo japo vitatu, Kidongo Chekundu, Muhimbili na Karume, ambavyo vitatengenezwa vizuri na kuoteshewa nyasi mfano wa Lugogo, tutakuwa tumepunguza tatizo kwa kiasi gani?

Temeke nako, pamoja na kuwapo Uwanja wa Taifa, lakini pia TCC, Bandari na Tandika Mabatini navyo vikafanyiwa ukarabati, je hali itakuwa nzuri kwa kiasi gani?

Tazama mashabiki wanavyokaa kwenye Uwanja huo

Jukwaa la upande wa pili la Lugogo

Kinondoni nako, viwanja vya kule mfano ule wa Chuo cha Ustawi wa Jamii, TPDC, Posta, Kinesi, Ufi au hata mwingine wowote, vikifanyiwa ukarabati wa aina hiyo, mambo yatakuwaje? 

Ninachokiona hapa, huu mzigo wa TFF bali serikali ya Jiji la Dar es Salaam kubeba jukumu la kuvikarabati viwanja hivyo. Nawashauri, viongozi wa Jiji la Dar es Salaam, wasafiri waje Kampala, siyo tu kuitazama Lugogo ili wajifunze nao namna ya kuboresha viwanja vya jiji hilo, bali na mambo mengine pia, ikiwemo muundo wa Jiji na usafi kwa ujumla. Kampala ya leo inavutia bwana pamoja na foleni ndefu zisizokatika.

Narudisha kumbukumbu zangu nyuma, miaka ya 1990 wakati Uwanja wa Karume ulipokuwa unatumika kwa mechi za timu ndogo za katikati ya Jiji, mfano Pentagon, Boom, Ashanti, Kumbukumbu na Cosmo, mashabiki walikuwa wanafurika uwanjani kwa sababu zinacheza maeneo ya karibu na maskani zao.

Lakini leo Ashanti ikirudi Ligi Kuu, itacheza mechi nne tu Uwanja wa Taifa na dhidi ya Simba na Yanga, nyingine zote sijui itapelekwa Chamazi, wangapi watakwenda? Hata African Lyon leo ingekuwa inachezea mechi zake Uwanja wa TCC, wangekuwa wanapata watu uwanjani.

Pande nyingine mbili mashabiki wanasimama tu Lugogo

Ni Uwanja simpo sana

Uongozi wa Jiji la Dar es Salaam unapaswa kujua viwanja ni uwekezaji mzuri kwa maslahi ya taifa, tena makubwa sana.  Leo ni timu kubwa za Dar es Salaam zinahaha sehemu za kufanyia mazoezi, lakini kama Jiji lingekuwa lina viwanja vya kutosha, lingekuwa linaingiza kiasi gani cha fedha?

Usisahau pia kuwepo kwa viwanja vingi vyenye hadhi, kutavutia vijana wengi kucheza soka na hivyo kutengeneza vipaji vingi zaidi. Je, Jiji wanaangalia yote hayo?

Tena siku hizi viwanja vinazungukwa na vyumba vya biashara kama maduka na sehemu za vinywaji labda, zote hizo ni fedha ambazo Jiji linazikosa kwa sasa kwa kukosa ubunifu. Wenzetu wanasoma sana ili kuongeza ujuzi na waweze kufanya kazi kwa ufanisi, lakini Watanzania tulio wengi tunasoma ili kutengeneza hadhi tu tuweze kuwa mabosi tunaolipwa mishahara makubwa, na si kufanya kazi nzuri. Tatizo hilo na lazima tubadilike.

Mh Juma Nkamia katikati akiwa na Ofisa Habari wa TFF, Boniface Wambura wakitazama mechi jana Lugogo

Rwanda na Eritrea Lugogo jana

Juzi tu hapa Kampala ulikuwa mji usiovutia hata kidogo, lakini leo imebadilika mno na hapa wanaostahili pongezi ni wenye mji wao, vipi sisi na Dar es Salaam yetu? Hapana, Dar es Salaam inaweza kuwa kabisa sawa na Kampala, iwapo uongozi wa Jiji utaamua kufanya kazi ya kuboresha mambo mbalimbali, likiwemo suala la viwanja. Jumapili njema. 

Sunday, December 02, 2012