KIIZA AWAZAWADIA BAO YANGA

Hamisi 'Diego' Kiiza

Na Mahmoud Zubeiry, Kampala

MSHAMBULIAJI wa Uganda, Hamisi Kiiza ‘Diego’ amesema bao la nne aliloifungia timu yake, The Cranes jana dhidi ya Sudan Kusini anawazawadia mashabiki wa klabu yake ambao wanafuatilia mashindano ya Kombe la Mataifa ya Afrika Mashariki na Kati, CECAFA Tusker Challenge, yanayoendelea mjini hapa.

“Mashindano haya yanaonyeshwa na SuperSport dunia nzima, najua Watanzania wanafuatilia, najua mashabiki wa klabu yangu wanafuatilia na kunisapoti, name kwa heshima nataka nataka tushangilia pamoja lile bao,”alisema Kiiza.

Kiiza alisema kwamba Yanga ni klabu ambayo inamlea vizuri na ndiyo maana ameendelea kuwa mchezaji wa kiwango cha juu.

“Nawaheshimu sana mashabiki wa Yanga, wamekuwa wakinihamasiaha kufanya vizuri kutokana na jinsi wanavyonishangilia, na kufanya kwangu vizuri Yanga ndio kunaniweka The Cranes siku zote,”alisema mchezaji huyo. 

Kiiza jana aliiongoza Uganda kufuzu kwa asilimia 100 hatua ya Robo Fainali ya Kombe la CECAFA Tusker Challenge baada ya kushinda mechi zake zote za Kundi A, ikiwemo ya jana waliyoshinda 4-0 dhidi ya Sudan Kusini.

Uganda na Kenya wamefuzu moja kwa moja, wakati Ethiopia walioshika nafasi ya tatu watasubiri hatima yao kufuzu kama mmoja wa washindi wa watatu bora kutoka makundi yote, A, B na C.

Kiiza alifunga bao lake dakika ya 79, wakati mabao mengine ya Uganda jana yalifungwa na Brian Umony mawili katika dakika za 23 na 39 na Robert Ssentongo dakika ya 47.

Katika mechi ya kwanza, Kenya ilishinda 3-1 dhidi ya Ethiopia, mabao ya Ramadhan Mohamed Salim, Clifton Miheso na David Ochieng, wakati la Ethiopia lilifungwa na Gatech Panom Yietch.

Michuano hiyo, itaendelea leo kwa mechi za Kundi B na C, saa 8:00 mchana, Tanzania Bara watamenyana na Somalia Uwanja wa Lugogo na baadaye saa 10:00, Rwanda itacheza na Eritrea wakati Sudan itaanza na Burundi saa 8:00 mchana Uwanja wa Wankulunkulu na baadaye saa 10:00 jioni Malawi watamenyana na Zanzibar Wankulunkulu.

Saturday, December 01, 2012