YANGA YAIPIGA 2-1 COASTAL PUNGUFU, BAHANUZI SHUJAA, MECHI NUSURA ISICHEZWE

Yanga wakishangilia bao la ushindi la Bahanuzi

Bahanuzi kulia akitafuta mbinu za kumtoka Nahodha wa Coastal, Saidi Swedi

Said Bahanuzi 'Spider Man'

Kikosin cha Coastal

Kaira akiwa amelala baada ya kujifunga, kulia ni kipa Juma Mpngo akimuangalia kwa 'hasira'

Kocha Saintfiet akiwapa mawaidha wachezaji wake, wakati huo bado wako nyuma kwa 1-0

Mohamed Binslum, mmoja wa wachezaji wa Coastal

Kocha Mgunda akizungumza na marefa wakati wa sakata la mgomo

Msuva aliyekaa chini- hapa alikosa bao la wazi

Mwasyika kulia akifumua shuti

Mwasyika akipita kulia, kushoto ni Saidi Swedi

Kaira kushoto akimdhibiti Bahanuzi

Razack Khalfan, mfungaji wa bao la Coastal

Seif Ahmad 'Magari', kigogo wa usajili Yanga, akizungumza na mwandaaji wa mechi ya leo, Bonga, kushoto ni Katibu wa Yanga, Celestine Mwesigwa

Kocha Saintfiet katikati na Msaidizi wake, Freddy Felix Minziro kulia wakimsihi kocha wa Coastal, Juma Mgunda aingize timu mapema mechi ianze  

Sainftiet anatoa timu uwanjani

WOTE NJE; Sainftiet akiwaamrisha wachezaji wake kutoka 

Kikosi cha Yanga kilichoanza

Yangab wakiwa chumbani kwao kabla ya kurejea kucheza

Na Mahmoud Zubeiry

MABAO mawili ya dakika za lala salama, leo yameinusuru Yanga SC kulala mbele ya Coastal Union ya Tanga, baada ya kushinda 2-1 katika mchezo wa kirafiki uliofanyika kwenye Uwanja wa Taifa, Dar es Salaam.  

Saidi Bahanuzi ‘Spider Man’, kwa mara nyingine leo alikuwa shujaa wa Yanga baada ya kufunga bao la ushindi dakika ya 85 katika mchezo, ambao Coastal Union ilimpoteza kiungo wake Jerry Santo aliyepewa kadi nyekundu kwa kumtolea maneno machafu refa Hashim Abdallah dakika ya 59.

Hilo lilikua bao lake la nane Bahanuzi tangu aanze kuichezea Yanga miezi miwili iliyopita, akitokea Mtibwa Sugar. Awali ya hapo, beki Mganda, Philip Kaira alijifunga katika harakati za kuokoa krosi ya Shamte Ally dakika ya 84.    

Hadi mapumziko, Coastal tayari walikuwa mbele kwa bao hilo moja lililotiwa kimiani na kiungo Razack Khalfan, aliyefumua shuti la umbali wa mita 26.

Razack alitokea Yanga B mwaka 2008 na kupandishwa kikosi cha kwanza mwaka 2009, chini ya kocha Mserbia, Profesa Dusan Savo Kondic, lakini misimu miwili baadaye akatolewa kwa mkopo African Lyon, ambao umeisha na msimu huu amesaini Coastal.

Kwa ujumla Razack, mdogo wa kiungo wa Yanga, Nizar Khalfan alicheza soka ya kusababisha swali kwa nini Yanga ilimuacha. 

Mechi hiyo ilichezeshwa na refa Hashim Abdallah aliyechezesha pia mechi ambayo Yanga ililala 5-0 kwa Simba katika Ligi Kuu msimu uliopita, ambaye leo amesaidiwa na Shaffi Mohamed na Iddi Maganga.

Awali, mchezo huo nusura uvunjike, baada ya kocha wa Yanga, Mbelgiji Tom Saintfiet kutoa timu uwanjani kutokana na kucheleweshwa kwa muda wa kuanza, ambao kimakubaliano ulikuwa saa 10:00 jioni.

Lakini Coastal walichelewa kufika uwanjani (walifika saa 10:05 jioni ) na kuanza kwanza kupasha misuli moto, jambo ambalo lilimkera Saintfiet na kusistiza waachane na mazoezi yao mechi ianze, lakini makocha wa timu hiyo ya Tanga, Juma Mgunda na Habib Kondo waliendelea na biashara yao.

Saintfiet akatoa timu yake uwanjani, kabla ya kwenda kubembelezwa na viongozi wake, ndipo akarejesha timu na mpira ukaanza saa 10:31 jioni.

Kwa ujumla Coastal walitawala kipindi cha kwanza mchezo huo na kipindi cha pili japokuwa mchezo ulikuwa wa pande zote mbili hata baada ya Santo kutolewa kwa kadi nyekundu, lakini Yanga waliuteka kabisa dakika 15 za mwishoni.

Kwa Coastal, hiyo inakuwa mechi ya nne Coastal wanafungwa ndani ya mechi tano za kujipima nguvu, nyingine zikiwa dhidi ya Bandari mara mbili, 3-2 Mombasa na 2-0 Tanga na 2-1 dhidi ya Polisi mjini Morogoro, wakati mechi waliyoshinda ni dhidi ya JKT Oljoro 2-0.

Kwa Yanga, chini ya kocha wake Mbelgiji, Saintfiet, hiyo inakuwa mechi ya 10 anashinda kati ya 11 alizocheza tangu ajiunge na kabu hiyo miezi miwili iliyopita.

Yanga SC; Ally Mustafa ‘Barthez’ (1), Juma Abdul (14)/Frank Domayo(18), Oscar Joshua (4)/Shamte Ally (15), Nadir Haroub ‘Cannavaro’ (23), Kelvin Yondan (5), Mbuyu Twite (9), Simon Msuva (27), Haruna Niyonzima (8), Said Bahanuzi (11)/Geoffrey Taita (17), Didier Kavumbangu (21)/Jerry Tegete (10) na Stefano Mwasyika (3)/David Luhende (29).

Coastal Union; Juma Mpongo (1), Saidi Swedi (26), Juma Jabu (15), Cyrprian Lukindo (27), Philip Kaira (18), Jerry Santo (6), Soud Mohamed (8)/, Salum Aziz Gilla (19), Razack Khalfan (28), Nsa Job (29), Atupele Green (3)/Dajnny Lyanga (16)na Suleiman Kassim ‘Selembe’ (25).

Saturday, September 01, 2012