SIMBA SC NA WALIOWAPIGA TATU SIMBA DAY ARUSHA LEO

Simba SC

Na Dina Zubeiry

SIMBA SC leo inashuka kwenye Uwanja wa Sheikh Amri Abeid mjini Arusha kumenyana na City Stars ya Nairobi, katika mchezo wa kirafiki kujiandaa na mechi ya Ngao ya jamii dhidi ya Azam FC, Septemba 11, mwaka huu, Uwanja wa Taifa, Dar es Salaam.

Hiyo itakuwa mechi ya pili kuzikutanisha timu hizo, awali Agosti 8, mwaka huu Simba ilichapwa mabao 3-1, Uwanja wa Taifa, Dar es Salaam. Lakini kufungwa huko kwa Simba kulitokana na kocha Mserbia Milovan Cirkovick, kubadilisha karibu kikosi kizima kilichoanza na kuingiza wachezaji wapya, ambao waliitoa City Stars ya Nairobi nyuma kwa 1-0 na kuipa ushindi wa 3-1.

Simba ilitangulia kupata bao kupitia kwa Felix Sunzu dakika ya 15, pasi ya Mwinyi Kazimot na ilikwenda kupiumzika ikiwa mbele kwa bao hilo.

Lakini kipindi cha pili, kipa aliyempokea Juma Kaseja, Hamadi Waziri alitunguliwa mabao matatu katika dakika 57 na Duncan Owiti, dakika ya 64 na Bruno Okullu na dakika ya 79 na Boniphace Onyango. 

Tayari Simba imecheza mechi mbili Arusha, dhidi ya Mathare United ya Kenya na JKT Oljoro ya Arusha, ambazo zote ilishinda 2-1, mshambuliaji mpya Daniel Akuffo kutoka Ghana akifunga bao moja kila mechi, Kiggi Makaasy na Mrisho Ngassa wakifunga mabao mengine.    

Simba inajiandaa na mechi ya Ngao ya Jamii Septemba 11, mwaka huu, Uwanja wa Taifa, Dar es Salaam, ambayo kihistoria hiyo itakuwa mechi ya tano ya Ngao ya Jamii kuchezwa nchini na ya pili kukutanisha timu nje ya wapinzani wa jadi wa soka ya Tanzania, Simba na Yanga.

Mtibwa ilicheza na Yanga mwaka 2009, baada ya Simba kugoma na ikashinda mabao 2-1 na kutwaa Ngao, wakati kabla ya hapo, mwaka 2001, Ligi Kuu ya Tanzania ikiwa bado inadhaminiwa na Kampuni ya Bia Tanzania (TBL), kupitia bia ya Safari Lager, ilichezwa mechi ya kwanza ya Ngao kihistoria.

Katika mechi hiyo, Yanga ilishinda mabao 2-1 dhidi ya Simba na mwaka juzi Yanga iliifunga tena Simba kwa penali 3-1 kufuatia sare ya 0-0 na mwaka jana, Simba ilitwaa Ngao ya kwanza katika historia yake, kwa kuifunga Yanga mabao 2-0. 

MABINGWA WA MECHI ZA NGAO YA JAMII:

Mwaka              Mshindi      Matokeo   

2001                  Yanga         2-1 Simba

2010                  Yanga         0-0 Simba (3-1penalti)

2011                  Simba         2-0 Yanga

Sunday, September 02, 2012