KAVUMBANGU MECHI NNE HAKUNA BAO, ILA MTAKATIFU HAKUNA MASWALI

Didier Kavumbangu; Mechi nne hakuna bao

Na Mahmoud Zubeiry

MSHAMBULIAJI mpya wa Yanga, Didier Kavumbangu bado anasota kuonyesha makali yake katika klabu yake mpya, Yanga iliyomsajili mwezi uliopita kutoka Atletico ya Burundi.

Kwa mara nyingine jana mpachika mabao huyo wa kimataifa wa Burundi alicheza mechi ya nne akiwa na jezi ya Yanga na kumaliza dakika 90 bila bao.

Yanga jana ilishinda 2-1, kwa mabao ya mawili ya dakika za lala salama, dhidi ya Coastal Union ya Tanga katika mchezo wa kirafiki uliofanyika kwenye Uwanja wa Taifa, Dar es Salaam. 

Saidi Bahanuzi ‘Spider Man’, kwa mara nyingine jana alikuwa shujaa wa Yanga baada ya kufunga bao la ushindi dakika ya 85 katika mchezo, ambao Coastal Union ilimpoteza kiungo wake Jerry Santo aliyepewa kadi nyekundu kwa kumtolea maneno machafu refa Hashim Abdallah dakika ya 59.

Hilo lilikua bao lake la nane Bahanuzi tangu aanze kuichezea Yanga miezi miwili iliyopita, akitokea Mtibwa Sugar. Awali ya hapo, beki Mganda, Philip Kaira alijifunga katika harakati za kuokoa krosi ya Shamte Ally dakika ya 84.   

Hadi mapumziko, Coastal tayari walikuwa mbele kwa bao hilo moja lililotiwa kimiani na kiungo Razack Khalfan, aliyefumua shuti la umbali wa mita 26.

Razack alitokea Yanga B mwaka 2008 na kupandishwa kikosi cha kwanza mwaka 2009, chini ya kocha Mserbia, Profesa Dusan Savo Kondic, lakini misimu miwili baadaye akatolewa kwa mkopo African Lyon, ambao umeisha na msimu huu amesaini Coastal.

Kwa ujumla Razack, mdogo wa kiungo wa Yanga, Nizar Khalfan alicheza soka ya kusababisha swali kwa nini Yanga ilimuacha.  

Mechi hiyo ilichezeshwa na refa Hashim Abdallah aliyechezesha pia mechi ambayo Yanga ililala 5-0 kwa Simba katika Ligi Kuu msimu uliopita, ambaye leo amesaidiwa na Shaffi Mohamed na Iddi Maganga.

Kocha wa Yanga alipowasili Uwanja wa ndege miezi miwili iliyopita, hapa anapokewa na viongozi wa timu hiyo.

Awali, mchezo huo nusura uvunjike, baada ya kocha wa Yanga, Mbelgiji Tom Saintfiet kutoa timu uwanjani kutokana na kucheleweshwa kwa muda wa kuanza, ambao kimakubaliano ulikuwa saa 10:00 jioni.

Lakini Coastal walichelewa kufika uwanjani (walifika saa 10:05 jioni ) na kuanza kwanza kupasha misuli moto, jambo ambalo lilimkera Saintfiet na kusistiza waachane na mazoezi yao mechi ianze, lakini makocha wa timu hiyo ya Tanga, Juma Mgunda na Habib Kondo waliendelea na biashara yao.

Saintfiet akatoa timu yake uwanjani, kabla ya kwenda kubembelezwa na viongozi wake, ndipo akarejesha timu na mpira ukaanza saa 10:31 jioni.

Kwa ujumloa Coastal walitawala kipindi cha kwanza mchezo huo na kipindi cha pili japokuwa mchezo ulikuwa wa pande zote mbili hata baada ya Santo kutolewa kwa kadi nyekundu, lakini Yanga waliuteka kabisa dakika 15 za mwishoni.

Kwa Coastal, hiyo inakuwa mechi ya nne Coastal wanafungwa ndani ya mechi tano za kujipima nguvu, nyingine zikiwa dhidi ya Bandari mara mbili, 3-2 Mombasa na 2-0 Tanga na 2-1 dhidi ya Polisi mjini Morogoro, wakati mechi waliyoshinda ni dhidi ya JKT Oljoro 2-0.

Kwa Yanga, chini ya kocha wake Mbelgiji, Saintfiet, hiyo inakuwa mechi ya 10 anashinda kati ya 11 alizocheza tangu ajiunge na kabu hiyo miezi miwili iliyopita.

Kocha Saintfiet alimpumzisha dakika ya 75 Kavumbangu na kumuingiza Jerry Tegete, ambaye  naye pia hakuziona nyavu.

Mechi alizoichezea Yanga Kavumbangu ni dhidi ya African Lyon, Yanga ikishinda 4-0 Dar es Salaam, Rayon mjini Kigali, Rwanda ambayo timu hiyo ilishinda 2-0 na dhidi ya Polisi nchini humo pia, ambayo timu hiyo ilishinda 2-1.

Yanga ilivutiwa na mshambuliaji huyo na kumsajili, kwa sababu aliwafunga mabao mawili katika mchezo wa kwanza wa Klabu Bingwa Afrika Mashariki na Kati, Kombe la Kagame, ikilala 2-0 dhidi ya Atletico katika michuano ambayo mwisho wa simu timu hiyo iliibuka bingwa.

Kwa upande wake, kocha Saintfiet ameendeleza rekodi yake nzuri akishinda mechi ya 10 kati ya 11 alizoiongoza timu hiyo tangu ajiunge nayo miezi miwili iliyopita.

REKODI YA SAINTFIET YANGA

1.                      Yanga Vs JKT Ruvu 2-0

2.                      Yanga Vs Atletico (Burundi) 0-2

3.                      Yanga Vs Waw Salam (Sudan Kusini) 7-1

4.                      Yanga Vs APR (Rwanda) 2-0

5.                      Yanga Vs Mafunzo (Z’bar) 1-1 (5-3penalti)

6.                      Yanga Vs APR (Rwanda) 1-0

7.                      Yanga Vs Azam 2-0

8.                      Yanga Vs African Lyon 4-0

9.                      Yanga Vs Rayon (Rwanda) 2-0

10.                    Yanga Vs Polisi (Rwanda) 2-1

11.             Yanga Vs Coastal Union 2-1

Sunday, September 02, 2012