HAYE NA KLITCHKO PAMBANO LANUKIA, WBC WASUKA MIPANGO

Klitschko anaweza kustaafu baada ya pambano lake lijalo 

David Haye anataka kuzipiga na Vitali Klitschko

David Haye yupo kwenye mazungumzo na Baraza la Ngumi Duniani (WBC) juu ya pambano na Vitali Klitschko.

Bingwa huyo wa zamani wa dunia wa uzito wa juu alirejea ulingoni kwa kishindo Julai, mwaka huu alimpomtwanga kwa Technical Knockout (TKO), Dereck Chisora kwenye Uwanja wa Upton Park.

Haye, mwenye umri wa miaka 31, kisha akaonyesha dhamira ya kupigana na Klitschko mkubwa, ambaye anatetea taji lake la WBC dhidi ya Manuel Charr mwezi ujao, ambalo linaweza kuwa pambano lake la mwisho.

Mbabe huyo wa Ukraine anafikiria kustaafu kama atafanikiwa kushinda Ubunge katika uchaguzi wa Oktoba 28, mwaka huu nchini kwao, lakini anaweza kumalizana na Haye, ambaye kwa sasa hana leseni ya kupigana Uingereza.

Baada ya kumdunda Chisora, mbabe huyo wa Bermondsey alisema: ‘Yeye (Vitali) hatasita kupigana na bingwa fulani, kisha astaafu na kujitosa kwenye siasa. Kama anataka kupigana na mimi, niko tayari.’

WBC iliripoti katika tovuti yake kwamba wamefanya mazungumzo na Haye mjini London.

 

Sunday, September 02, 2012