AZAM NA MAJERUHI WA YANGA COASTAL CHAMAZI LEO

Azam FC

Na Princess Asia

AZAM FC leo inashuka kwenye Uwanja wake wa Chamazi, kumenyana na Coastal Union ya Tanga katika mchezo wa kirafiki kujiandaa na mechi ya Ngao ya Jamii dhidi ya Simba SC, Septemba 11, mwaka huu.

Coastal jana ilifungwa mechi ya nne kati ya tano za kujipima nguvu ilizocheza na leo itataka kurejesha matumaini ya mashabiki wake ambao wamekwishaanza kukata tamaa, kiasi cha kutokuwa na imani na benchi la ufundi la timu yao.

Ilifungwa 3-2 na Bandari mjini Mombassa, baadaye 2-0 Tanga, ilifungwa 2-1 na Polisi mjini Morogoro na kabla ya kufungwa na Yanga jana 2-1, iliifunga JKT Oljoro 1-0.

Azam imetoka kushinda mechi mbili mfululizo za kujipima nguvu, ya mwisho ikiifunga 1-0 Prisons ya Mbeya kwenye Uwanja huo huo wa Chamazi, bao pekee la kiungo Ibrahim Mwaipopo dakika ya 34, baada ya kupunguza mabeki wawili wa Prisons na kutumbukiza mpira nyavuni.

Mchezo uliotangulia, Azam iliichapa mabao 8-0 Transit Camp Uwanja huo huo wa Chamazi, John Bocco ‘Adebayor’ akifunga mabao mawili sawa na Papie, mshambujliaji mpya aliye kwenye majaribio kutoka Jamhuri ya Kidemokrasia ya Kongo (DRC), Kipre Herman Tcheche na Abdulhalim Humud.

Azam inatarajiwa kuivaa Simba katika mechi ya Ngao ya Jamii ya kuashiria kufunguliwa kwa pazia la Ligi Kuu ya Vodacom Tanzania Bara, Septemba 11, mwaka huu, Uwanja wa Taifa, Dar es Salaam, ikiwa ni mchezo wake wa kwanza katika historia ya Ngao hiyo.

Kihistoria hiyo itakuwa mechi ya tano ya Ngao ya Jamii kuchezwa nchini na ya pili kuishirikisha timu nje ya wapinzani wa jadi wa soka ya Tanzania, Simba na Yanga.

Mtibwa ilicheza na Yanga mwaka 2009, baada ya Simba kugoma na ikashinda mabao 2-1 na kutwaa Ngao, wakati kabla ya hapo, mwaka 2001, Ligi Kuu ya Tanzania ikiwa bado inadhaminiwa na Kampuni ya Bia Tanzania (TBL), kupitia bia ya Safari Lager, ilichezwa mechi ya kwanza ya Ngao kihistoria.

Katika mechi hiyo, Yanga ilishinda mabao 2-1 dhidi ya Simba na mwaka juzi Yanga iliifunga tena Simba kwa penali 3-1 kufuatia sare ya 0-0 na mwaka jana, Simba ilitwaa Ngao ya kwanza katika historia yake, kwa kuifunga Yanga mabao 2-0.

Ikumbukwe mara ya mwisho Simba SC ilipokutana na Azam FC, katika Robo Fainali ya Klabu Bingwa Afrika Mashariki na Kati, Kombe la Kagame mwezi uliopita Dar es Salaam, ilifungwa mabao 3-1, yote yakifungwa na Bocco na lile la kufutia machozi kwa wekundu hao Msimbazi liliwekwa kimiani na beki mahiri Shomari Kapombe, aliyemajeruhi kwa sasa.  

Sunday, September 02, 2012