OKWI AKWAMA ULAYA, MANJI AMSAKA KWA GHARAMA YOYOTE, BAHANUZI KWENYE RADA ZA SIMBA

WA HAPA HAPA; Okwi amekwama Ausrtia, anarudi Dar

Na Mahmoud Zubeiry

SIJUI imekuwaje, lakini habari ambazo BIN ZUBEIRY imezipata mida hii, ni kwamba, klabu ya FC Red Bull Salzburg ya Wals-Siezenheim, Austria haitamnunua tena mshambuliaji wa Simba SC, Emmanuel Arnold Okwi, licha ya awali kuelezwa kwamba amefuzu majaribio katika klabu hiyo, baada ya wiki tatu za kuwa nchini humo akijaribiwa.

Chanzo cha habari kutoka Simba kimesema kwamba, Okwi amekwama na anarejea Simba SC, lakini wakati huo huo, habari ambazo zimeenea mjini, katika kulipa kisasi cha kumkosa Mrisho Khalfan Ngassa, Mwenyekiti wa Yanga, Yussuf Mehboob Manji anaisaka saini ya Okwi kwa gharama yoyote.

Hivi sasa Okwi yuko tayari Uganda, baada ya kurejea kutoka Austria, akidai amerudi kujitibu Malaria.

Jana, Katibu wa Simba Evodius Mtawala aliiambia BIN ZUBEIRY kwamba; “Okwi amefuzu majaribio, ila ana Malaria, amekuja kuitibu kasha anarudi Austria kwa ajili ya vipimo,”alisema Mtawala.

Kukwama kwa Okwi kunaikosesha Simba Euro 600,000 ambazo klabu hiyo, ilikuwa tayari kutoa.

Awali, Simba ilipata ofa ya kumuuza Okwi kwa Sh. Bilioni 2 kwa klabu ya Mamelodi Sundown ya Afrika Kusini, lakini mshambuliaji huyo akasema anataka kwenda Ulaya.

Awali Olando Pirates ya Afrika Kusini ilimuomba Okwi akafanye majaribio huko kama angefuzu wangemsajili dau la dola 550,000 kabla ya kuibuka kwa taarifa za kutakiwa Italia na klabu ya Parma.

Wakati huo huo, habari nyingine ambazo zinatikisa Jiji kwa sasa ni Said Bahanuzi ‘Spider Man’ kusaini Simba, lakini BIN ZUBEIRY imezungumza na mfungaji huyo bora wa Klabu Bingwa Afrika Mashariki na Kati, Kombe la Kagame, na akasema; “Sina tatizo na Yanga, mimi mchezaji halali wa Yanga, na sina mpango wa kwenda Simba kwa sasa, huo ni uzushi kaka,”alisema. 

Friday, August 03, 2012