MTAKATIFU TOM AWASUTA VIZABIZABINA; SIJAOMBA KAZI POPOTE TANGU NITUE YANGA

Kushoto ni Mtakatifu Tom na kulia ni jamaa gani sijui

Na Prince Akbar

KOCHA wa klabu bingwa soka ya Afrika Mashariki na Kati, Yanga SC, Mbelgiji Tom Saintefiet amesema kwamba tangu amejiunga na klabu hiyo mwezi uliopita hajawahi kuomba kazi sehemu nyingine yoyote.

Akizungumza na BIN ZUBEIRY leo, Mtakatifu Tom amesema anashangazwa mno na habari hizo za kizushi, za kizandiki zenye kulenga kumchonganisha yeye na mwajiri wake, Yanga SC.

“Nakumbuka niliwahi kuomba kazi Chama  cha Soka Kenya (KFF) kufundisha timu yao ya taifa (Harambee Strars), lakini ilikuwa ni muda mrefu sana hata kabla sijaomba kazi Yanga,”alisema kocha huyo aliyeipa Yanga ubingwa wa Afrika Mashariki na Kati, Kombe la Kagame Jumamosi, akiifunga Azam FC 2-0.

Blog moja iliyowahi kuandika Iddi Kipingu anagombea Uenyekiti Yanga, leo imeandika habari yenye kichwa kisemacho; “WIKI MOJA BAADA YA KUIPA UBINGWA: KOCHA WA YANGA TOM SAINTFIET ATUMA MAOMBI YA KUIFUNDISHA HARAMBEE STARS,”.

Akiizungumzia habari hiyo, Mtakatifu Tom alisema; “Ni uongo, tangu nimesaini mkataba na Yanga, sijawahi kuomba kazi pengine popote,”alisema.

Wednesday, August 01, 2012