MILIONEA YANGA AVAMIA KAMBI YA APR, NI YULE ALIYEMSAJILI NIYONZIMA

Bin Kleb

Na Mahmoud Zubeiry

MJUMBE wa Kamati ya Utendaji ya Yanga, Abdallah Ahmad Bin Kleb yupo Kigali, Rwanda na jana alionekana kwenye kambi ya APR- dhahiri anataka kusajili mchezaji mpya kutoka klabu hiyo.

Huyu Bin Kleb ndiye aliyemsajili Haruna Hakizimana Fadhil Niyonzima Yanga kutoka APR msimu uliopita na dhahiri kuwapo kwake katika kambi ya APR si bure. Mapema mwezi uliopita, kulikuwa kuna habari, Yanga inataka kumsajili mshambuliaji wa APR, Olivier Karekezi.

Lakini habari hizo zilipungua nguvu kutokana na mchezaji huyo kushindwa kung’ara kwenye michuano ya Klabu Bingwa Afrika Mashariki na Kati, Kombe la Kagame mwezi uliopita.

Tayari Alhaj Ismail Aden Rage, yupo njiani kurejea Dar es Salaam ‘kishujaa’, akitokea Kigali, Rwanda baada ya kukamilisha usajili wa beki wa APR, Mbuyu Twite jana.

Habari za ndani kutoka Simba SC, zilisema jana kwamba Simba imemsainisha Twite, mkataba wa miaka miwili wenye thamani ya Sh. Milioni 50, akitanguliziwa Milioni 30 na nyingine atapewa baadaye.

Twite atakuwa akilipwa Sh. Milioni 2 mshahara kwa mwezi, sawa na Mrisho Ngassa aliyesajiliwa jana rasmi kutoka Azam.

APR hawajapata senti tano nyekundu katika uhamisho wa beki huyo wa Amavubi, kwa kuwa amemaliza mkataba wake mwezi huu jeshini.

Simba imekubaliana na ndugu yake Mbuyu, kiungo Kabange Twite kuingia naye mkataba Desemba mwaka huu, akimaliza mkataba wake na APR.

Friday, August 03, 2012