MANJI AAPISHWA NA MAMA KARUME LEO JANGWANI

Kutoka kushoto Mussa Katabaro, Clement Sanga, Abdallah Bin Kleb na Lameck Nyambaya, ambaye alianguka kwenye uchaguzi

Na Prince Akbar

UONGOZI mpya wa klabu ya Yanga, chini ya Mwenyekiti wake, Yussuf Mehboob Manji, unatarajiwa kutambulishwa rasmi mbele ya Mjumbe wa Baraza la Wadhamini la klabu hiyo na Mlezi wa klabu hiyo, Mama Fatuma Karume, makao makuu ya klabu, makutano ya mitaa ya Twiga na Jangwani, Dar es Salaam kuanzia saa 4:00 asubuhi leo.

Baada ya hapo, Wachezaji na viongozi wa Yanga watasafiri kwenda Dodoma, kwa ajili ya mwaliko wa Wabunge wa Bunge la Jamhuri ya Muungano wa Tanzania, wapenzi wa klabu hiyo, Jumatatu.

Manji

Wabunge hao, wamewaalika wachezaji wa Yanga, baada ya kutwaa taji la Klabu Bingwa ya soka Afrika Mashariki na Kati, Kombe la Kagame, kwa mara ya pili mfululizo Jumamosi iliyopita, wakiifunga Azam FC mabao 2-0 kwenye fainali, Uwanja wa Taifa, Dar es Salaam.

Julai 15, mwaka huu, Yanga ilipata viongozi wapya, ambao ni Mwenyekiti Yussuf Manji, Makamu wake, Clement Sanga na Wajumbe wanne wa Kamati ya Utendaji, Abdallah Bin Kleb, George Manyama na Mussa Katabaro.

Hao wanaungana na Wajumbe wengine waliosalia kutoka uongozi uliochaguliwa mwaka juzi, Mohamed Bhinda, Titto Osoro, Salim Rupia na Sarah Ramadhan, baada ya wajumbe wengine, wakiwemo Mwenyekiti, Wakili Lloyd Nchunga na Makamu wake, Davis Mosha kujiuzulu.   

Sunday, August 05, 2012