YANGA WAPOKEE MAGEUZI HAYA, WAWE NA SUBIRA

Na Mahmoud Zubeiry

AKIIONGOZA kwa mara ya kwanza katika mechi, kocha Mbelgiji Thom Saintfiet jana aliiwezesha Yanga, kushinda mabao 2-0 dhidi ya JKT Ruvu katika mchezo wa kirafiki uliofanyika kwenye Uwanja wa Taifa, Dar es Salaam.

Mabao ya Yanga yalifungwa na beki Nadir Haroub ‘Cannavaro’ dakika ya 18 kwa kichwa akiunganisha kona ya Juma Abdul, wakati la pili lilifungwa na Mwanasoka Bora wa Uganda, Hamisi Kiiza ‘Diego’ dakika ya 72, akiunganisha pasi ya nyota wa Rwanda, Haruna Niyonzima.

Katika mchezo huo, ilishuhudiwa mabadiliko ya kiuchezaji kwenye kikosi cha Yanga, wakicheza soka ya utulivu, bila kukimbia ovyo kama ilivyo ada yao, muda mwingi wakitulia kwenye eneo lao na kufanya mashambulizi ya mipango.

Yanga ilitumia mshambuliaji mmoja tu kwenye mchezo huo, Jerry Tegete huku viungo zaidi wakilundikwa uwanjani.

Baada ya mchezo huo, nilizungumza na kocha Thom na akasema kwamba ameridhishwa na uchezaji wa timu na matokeo pia na anaamini taratibu timu itazidi kuimarika hadi kwenye michuano ya Klabu Bingwa Afrika Mashariki na Kati, Kombe la Kagame.

Alisema baada ya mechi hiyo, atakuwa na vipindi vitatu zaidi vya mazoezi kabla ya mechi ya ufunguzi wa Kombe la Kagame Jumamosi dhidi ya Atletico ya Burundi.

Alisema atafanya siku moja moja kuanzia leo, kesho na keshokutwa kabla ya kushusha timu uwanjani Jumamosi kukata utepe wa Kagame. Yanga ndio mabingwa watetezi wa michuano hiyo, inayoshirikisha timu za Simba na Azam pia katika orodha ya wenyeji.

Lakini, baada ya mechi hiyo minong’ono ilitawala juu ya namna ambavyo Yanga walicheza- wakiwapa fursa wapinzani kuwa na mpira zaidi.

Ndiyo, ndivyo ilivyokuwa, muda mrefu Yanga walikuwa wakiwaachia wapinzani mpira na wao kufanya kazi ya kuzuia, huku wakifanya mashambulizi ya kushitukiza.

Mtakatifu Thom akifundisha

SOKA NI TAALUMA

Soka ni mchezo, lakini ni taaluma ambayo makocha wanaenda darasani na baada ya hapo wanafanya tathmini za kutafuta ubunifu ili kuweza kumudu ushindani katika soka ya kisasa.

Tumeshuhudia michuano ya Kombe la Mataifa ya Ulaya hivi karibuni, Euro 2012, Hispania wakiibuka mabingwa, baada ya kuifunga Italia 4-0 katika mchezo wa mwisho.

Lakini ukiirejea fainali ile kwa kina na kujiuliza kwa nini Italia ilifungwa ‘kimdebwedo’ namna ile utagundua kitu kimoja tu, The Azzuri walishindwa kujitofautisha na La Rojja mapema kabla ya mechi hiyo.

Kama Italia wangejitathmini kwa maana ya kila mchezaji na timu na wakawatathmini wapinzani wao, basi wasingecheza walivyocheza hata wakafungwa 4-0.

Italia walifunguka katika mchezo ule wakafakiria tangu mwanzo kuwashambulia wapinzani, ambao wako vema kuliko wao kimchezo kwa tofauti kubwa mno.

Hispania wazuri kuanzia namba moja hadi 11- kwa maana ya safu ya ulinzi, kiungo na ushambuliaji, kwa ujumla La Rojja ni wazuri kama timu kuliko Azzuri.

Hilo Italia hawakulitazama na ndiyo maana wakajaribu kushindana uwezo na Hispania, matokeo yake wakapata kipigo kiliochoharibu ladha ya fainali. Rejea Nusu Fainali na Fainali ya Ligi ya Mabingwa Ulaya msimu huu, namna ambavyo Chelsea ikiongozwa na Roberto de Matteo, iliweza kwanza kuwavua ubingwa Barcelona kabla ya kumbeba mwali kwa kuifunga Bayern Munich nyumbani kwake.

Utagundua kwamba, soka ni taaluma ambayo inahitaji nidhamu ya hali ya juu na kujitambua pia, tena dhidi ya mtu unayekwenda kukabiliana naye na ndiyo maana katika dunia ya soka ya leo, hupaswi kumdharau mtu au timu yoyote.

Tazama eneo la JKT, Yanga wachache kama hapa Nizar anapotaka kutoa krosi mbele ya wachezaji watatu

NINI ANAFANYA MTAKATIFU THOM?

Wakati anasaini mkataba Yanga wiki iliyopita, alisema kwamba falsafa yake ni ushindi, iwe bao 1-0 au 5-0, anachotaka ni ushindi tu. Hakutaka kuzama ndani sana, na yeye mwenyewe akisema hataki kuwapa faida wapinzani wake wajue mbinu zake mapema, lakini kwa weledi baada ya mechi ya jana wanaweza kupata picha kamili kuhusu falsafa yake.

Mimi nililifanyia kazi hilo mapema tu, baada ya kusaini mkataba nilifuatilia mazoezi yake na nilimsikia kwa kina anawaelekeza nini wachezaji wake.

Kwa muda mrefu asili ya soka ya Yanga imekuwa ni kukimbiza mpira uwanjani, muda wote kushambulia na ndiyo maana aina ya wachezaji wengi wa klabu hiyo ni wale wenye kasi.

Hata msimu huu, Yanga imesajili wachezaji wengi wenye kukimbiza mpira, kwa maana ya wachezaji wenye kasi- na katika mechi ya awali ya kujipima nguvu ya klabu hiyo dhidi ya Express ya Uganda, dakika zote 45 za kwanza Watoto wa Jangwani Uwanja wote ulikuwa wao katika mechi hiyo waliyoshinda 2-1.

Lakini siku ya kwanza kabisa baada ya Mtakatifu Thom kusaini mkataba, nilimfuatilia uwanjani, miongoni mwa maneno niliyosikia akiwaambia wachezaji wake ni kwamba hataki mchezo wa kukimbia kimbia, anataka soka ya kutulia na hata katika mazoezi yake hatakuwa akiwakimbiza sana wachezaji zaidi ya kuchezea mpira sana.

Nikamfuatilia tena siku mbili zilizofuata, anawafundisha nini Yanga, nilichogundua ni kile nilichokiona jana- hataki kucheza kwa kupoteza nguvu na pumzi nyingi bila faida. Anataka soka ya mipango.

Wachezaji wake wanatulia kwenye eneo lao wakati wapinzani wana mpira, lakini wanawamulika vema wapinzani wao hao katika mienendo yao wasivuke kwenye mipaka yao.

Unaweza kusema ni mchezo fulani maarufu kama wa kupaki basi, ambao mfalme wake Jose Mourinho, kocha Mreno wa Real Madrid, lakini mwisho wa siku katika soka ya kulipwa unaweza kuuita mfumo wa ushindi na ndiyo maana Mtakatifu Thom anajiita muumini wa ushindi.

Rejea mechi ya jana ya Yanga na JKT, kweli kwa kiasi kikubwa JKT waliachiwa fursa ya kuwa na mpira, lakini nani alifanya mashambulizi mengi? Nani alipata mabao? Ukipata majibu ya hayo maswali mawili huwezi kuacha kuukubali mfumo huu mpya wa Yanga chini ya Mtakatifu Thom.

Bado Yanga wanafanya idadi kubwa ya mashambulizi ya mipango, kama hivi jana na JKT Ruvu

KWA NINI YANGA IJIHAMI KWA JKT?

Labda yanaweza kuibuka maswali, kwa nini Yanga icheze mfumo huu kwa timu kama JKT Ruvu, ambayo ilimaliza Ligi Kuu katika nafasi ya nane, timu ambayo huwezi kuiita ya ushindani katika ubingwa wa ligi hiyo, zaidi tu ya kuwaita wasumbufu?

Kama Yanga wanacheza kwa kupaki basi katika mechi na JKT, vipi wakikutana na timu kama Simba au Azam tu kwa mfano- au wakienda kwenye michuano ya Afrika?

Ndiyo, haya ni maswali sahihi kabisa baada ya mechi ya jana. Lakini kama nilivyosema hapo juu, soka ni taaluma, ambayo walimu pamoja na kusomea darasani, mwisho wa siku katika kujiendeleza zaidi wanazama ndani katika kufanya ubunifu ili kuweza kumudu ushindani wa soka ya leo.

Walimu wana malengo na mitazamo- na ambayo wanapaswa kuyafanyia kazi kwa maana ya kuyajengea mazingira ya kufanya kazi. Ni kama ndondi tu, bondia anajiandaa kupigana na bondia, lakini mazoezini anapigana na begi tu.

Bondia namba mbili kwa ubora anajiandaa kupigana na bondia bingwa, lakini mazoezini anapigana na bondia ambaye hayumo hata kwenye orodha ya mabondia 10 bora. Na anapigana naye kwa namna ambavyo amepanga kwenda kupigana na mpinzani wake siku ya siku.

Akili ya Thom haipo hapa kabisa; Ananaangali Afrika 2014

THOM ANATAZAMA MBALI

Mapema tu wakati anamaliza kusaini mkataba, Mtakatifu Thom alisema sera yake ni ushindi na mataji. Mataji yatakuja kutokana na kazi ambayo itafanywa na timu yake. Timu itafanya kazi baada ya kuandaliwa kuifanya hiyo kazi.

Waandishi wa Habari tunapenda kutumia maneno maandalizi ya zimamoto, au kutokuwa na dira wala mwelekeo katika habari au makala zetu, lakini sina uhakika kama wengi huwa tunatumia maneno haya huku tukielewa maana yake halisi.

Sawa, maandalizi ya zimamoto maana yake maandalizi ya kukurupuka badala ya kuwa na maandalizi ya muda mrefu.

Kutokuwa na dira wala mwelekeo ni kukosa malengo na njia za kukufikisha pale ambako unaota kufika.

Kwa mfano Yanga leo, wanacheza Ligi Kuu ili wawe mabingwa na wapate tiketi ya kucheza Ligi ya Mabingwa Afrika, lakini wanajichezea tu ili wakashiriki michuano hiyo mikubwa Afrika bila ya kuwa na maandalizi ya kucheza michuano hiyo.

Mfumo ambao Yanga wanataka kucheza kwenye Ligi ya Mabingwa, lazima waufanyie kazi mapema, wauzoee, wamudu na wakati ukifika wajue wanafanya nini. Haya ni maandalizi.

Lakini ukija kwa upande wa dira na mwelekeo- Yanga wanatakiwa wajue mapema aina ya wapinzani ambao watakwenda kukutana nao kwenye michuano ya Afrika.

Soka yetu iko chini na wachezaji wetu wanazidiwa uwezo na wachezaji wa nchi nyingine Afrika na ndiyo maana kila mwaka hatufiki mbali. Ila kama tutajipanga kwa kutengeneza dira na mwelekeo, basi inawezekana kufanya kile ambacho Chelsea walifanya dhidi ya Barcelona na Bayern.

Lazima tujitambue na tuwaheshimu wapinzani wetu- ili siku tukienda kucheza nao, tucheze kwa adabu kwa lengo la la kutimiza azma ya kushinda na kutwaa taji.

Thom hawaangalii JKT Ruvu na nina imani hawaaangalii Azam kwa jinsi nilivyomsoma, bali anataka kuwatumia wote kumtengenezea timu ya kushindana na TP Mazembe, Al Ahly, Esperance na vigogo wengine wa Afrika.

Anataka Yanga wazoee mfumo wa kucheza wakikutana na timu bora Afrika. Thom anawafundisha soka Yanga.

SOKA NI MABAO; Hata Pele, mfalme wa soka duniani alisema siku nyingi...hapa Yanga wanashangilia bao

YANGA WAWE WAVUMILIVU NA WENYE SUBIRA

Baada ya mechi kati ya Simba na Express iliyoisha kwa sare ya bila kufungana wiki mbili zilizopita, nilifanya mahojiano na kocha wa mabingwa hao wa Uganda, waliofungwa na Yanga 2-1 siku moja kabla- nikamuuliza ipi timu nzuri kati ya hizo mbili za Tanzania.

Kocha huyo akasema Yanga wanatisha zaidi kwa sababu muda wote wanashambulia tu na kasema mbele ya Simba, safu yake ya ulinzi ilikuwa likizo. Lakini narejea miaka minne iliyopita, Yanga ikiwa chini ya Profesa Dusan Savo Kondic, ililazimishwa sare na hawa hawa JKT, tena kocha akiwa yule yule ambaye yupo hadi leo, Charles Killinda.

Killinda ni mchezaji wa zamani wa Yanga, na nilipofanya naye mahojiano baada ya mechi, alisema Yanga lazima wabadilike, wajifunze kuchezea mpira, haiwezekani muda wote wao wanashambulia tu.

Kwa kweli, mimi kama binadamu kwa wakati huo sikumuelewa Killinda, ila haikuchukua muda mrefu kumuelewa- na kukubali kwamba, mfumo ambao Yanga wamekuwa wakiutumia kwa muda mrefu ni wa ovyo.

Lakini kwa kujua kabisa mashabiki wa Yanga wamezoea kuwaona wachezaji wao wakikimbiza uwanjani tangu enzi za akina Leonard Chitete na ndiyo maana hadi leo wanamlilia Mrisho Ngassa na hawawezi kumsahau Edibily Lunyamila, nasema umefika wakati wabadilike na wawe tayari kupokea mageuzi ya kiuchezaji chini ya kocha wao mpya, Thom.

Nawasihi, mashabiki wa Yanga wakati Thom anaingia na timu kwenye michuano ya Kombe la Kagame, wampe ushirikiano na wawe na subira. Najua miongoni mwa mashabiki wa Yanga wapo mashabiki wa Chelsea na Mourinho- basi wawe na subira.

Wawe na subira kwa sababu, Thom haangalii timu za Kagame wala Ligi Kuu ya Bara, bali anafikiria Ligi ya Mabingwa Afrika 2014. Kwa uzoefu wangu wa makocha wa kigeni, kuanzia ngazi ya klabu hadi timu ya taifa, ni kwamba Thom ni kocha wa ukweli.

Anawapongeza marefa; yote furaha ya ushindi, angefungwa angekumbuka hili?

Yanga wamvutie subira na wakubaliane na falsafa zake, na wakiweza hivyo iko chini ya Mtakatifu Thom, watavunja rekodi za wapinzani wao wa jadi, Simba kuwa timu yenye mafanikio zaidi katika michuano ya Afrika. Naishia hapa wapendwa.

Wednesday, July 11, 2012