YANGA WAANZA KAZI ZANZIBAR LEO

Kikosi cha kwanza cha Yanga, ambacho kinaendelea na mazoezi Dar es Salaam, wakati wadogo zao wapo visiwani Zanzibar

Na Prince Akbar

MICHUANO ya Kombe la Urafiki, inatarajiwa kuendelea leo kwenye Uwanja wa Amaan, Zanzibar kwa Yanga kumenyana na Jamhuri ya Pemba.

Yanga ambayo imepeleka wachezaji wake wa kikosi cha vijana visiwani humo, imeahidi kuongeza wachezaji kulingana na maendeleo ya timu.

Katika mechi za ufunguzi jana, Simba SC walianza vyema baada ya kuwafunga wenyeji Mafunzo mabao 2-1, wakati Azam ililazimishwa sare ya 1-1 na U23, Karume Boys.

Abdallah Juma, ambaye amepokewa Simba kama Emmanuel Gabriel mpya, alifunga bao la kwanza dakika ya 27 akiunganisha pasi muruwa ya Patrick Kanu Mbivayanga dakika ya 27.

Mshambuliaji huyo mrefu kutoka Ruvu Shooting ya Pwani, alifunga bao la pili dakika ya 44 kwa kichwa, akiunganisha pasi ya Mbiyavanga tena, kiungo kutoka Jamhuri ya Kidemokrasia ya Kongo (DRC).

Mafunzo walipata bao lao dakika ya 80, mfungaji Jaku Joma.

Katika mchezo wa leo, kwa mara ya kwanza mshambuliaji Danny Mrwanda aliichezea Simba tangu asajiliwe tena mwezi uliopita akitokea Dong Tam Long An ya Vietnam.

Simba, mabingwa wa Tanzania walichezesha kikosi chao kamili, ingawa Emmanuel Okwi, Felix Sunzu na Haruna Moshi ‘Boban’ wameendelea kukosekana. 

Simba; Juma Kaseja, Haruna Shamte, Amir Maftah/Paul Ngalema, Lino Masombo, Shomary Kapombe, Amri Kiemba, Danny Mrwanda/Mwinyi Kazimoto, Mussa Mudde/Paul Ngalema, Abdallah Juma/Uhuru Suleiman, Kanu Mbivayanga/Haroun Othman na Kiggi Makassy.

Mafunzo: Suleiman Janabi, Hajji Abdi, Ally Juma, Yussuf Makame, Said Mussa, Juma Othman, Abdulrahim Mohamed, Suleiman Kassim ‘Selembe’, Ismail Khamis, Juma Jaku na Ally Othman.

Azam ilinusurika kulala mbele ya timu ya taifa ya vijana chini ya umri wa miaka 23 (U23) ya Zanzibar, Karume Boys baada ya kulazimisha sare ya kufungana bao 1-1.

Karume Boys walipata bao la kuongoza dakika ya 45 kwa njia ya penalti, mfungaji Ibrahim Hamisi.

Kipindi cha pili Azam walikuja juu na dakika ya 79 wakafanikiwa kusawazisha kupitia kwa mshambuliaji wa Ivory Coast, Kipre Tcheche.

RATIBA KAMILI MICHUANO YA URAFIKI

Julai 2, 2012

Karume Boys 1-1 Azam

Mafunzo 1-2 Simba SC

Julai 3, 2012

Z’bar Stars Vs Super Falcon

Jamhuri Vs Yanga SC

Julai 4, 2012

Karume Boys Vs Mafunzo

Simba SC Vs Azam

Julai 5,2012

Super Falcon Vs Jamhuri

Yanga Vs Zanzibar Stars

Julai 6, 2012

Azam Vs Mafunzo

Karume Boys Vs Simba SC

Julai 7, 2012

Jamhuri Vs Zanzibar Stars

Super Falcon Vs Yanga SC

Julai 8, 2012

MAPUMZIKO

Julai 9, 2012

Nusu Fainali ya kwanza

Julai 10, 2012

Nusu Fainali ya pili

Julai 11, 2012

MAPUMZIKO

Julai 12, 2012

Fainali

(Mechi za kwanza zitachezwa saa 10:30 jioni na mechi za pili saa 2:00 usiku, Uwanja wa Amaan)

Tuesday, July 03, 2012