YANGA NA WASUMBUFU WA LIGI KUU TAIFA LEO

Silaha mpya za Yanga zikiwa zimeongezana, wa mbele Yondan, anayemfuatia Juma Abdul, Said bahanuzi na Barthez

Na Prince Akbar

MABINGWA wa soka Afrika Mashariki na Kati, Yanga SC ya Dar es Salaam leo wanashuka kwenye Uwanja wa Taifa, Dar es Salaam, kumenyana na JKT Ruvu katika mchezo wa kirafiki, kujipima nguvu kabla ya kuanza kutetea taji lake, Kombe la Kagame Jumamosi.

Mchezo huo utakaofanyika Uwanja wa Taifa, Dar es Salaam ni ambao kocha mpya, Thom Saintfiet kutoka Ubelgiji aliuhitaji mno ili kutazama mapungufu kikosini mwake, kabla ya kuanza kwa michuano hiyo.

Mchezo huu utakuwa kipimo kizuri kwa Yanga, kwa sababu JKT Ruvu ni timu ya ushindani katika Ligi Kuu na msimu uliopita ilimaliza katika nafasi ya nane kwa kujikusanyia pointi 32, sawa na Kagera Sugar iliyomaliza nafasi ya saba.

Ruvu inayonolewa na mchezaji wa zamani wa Yanga, Charles Killinda imekuwa ikitoa wachezaji wazuri wenye vipaji na kwa mfano msimu huu, mabingwa hao wa Afrika Mashariki na Kati wamemsajili Frank Damayo kutoka timu hiyo ya jeshi na msimu uliopita walimsajili Juma Seif ‘Kijiko’.

Wapinzani wao wa jadi, Simba nao wanaye kiungo Mwinyi Kazimoto, waliyemtoa JKT Ruvu pia msimu uliopita, lakini ndani ya kikosi cha timu hiyo kuna wakali wengine ambao leo wanatarajiwa kuipa changamoto nzuri Yanga kabla ya kuanza kwa Kagame.

Mashabiki wa Yanga leo watarajie mapinduzi makubwa ya soka katika klabu yao, kutoka ule mfumo wa kusukuma mashambulizi mfululizo hadi kucheza soka ya utulivu ya pasi nyingi, tena timu ikitumia mshambuliaji mmoja tu kwa falsafa ya ‘Mtakatifu Thom’ ambayo imekuwa ikifanyiwa kazi mazoezini tangu mwalimu huyo aanze kazi siku tano zilizopita.

Aidha, kwa wana Yanga leo ni siku nyingine ya kuwashuhudia wachezaji wao wapya waliosajiliwa kwa fedha nyingi, kama kipa Ally Mustafa ‘Barthez’, beki Kelvin Yondan kutoka Simba, beki Juma Abdul kutoka Mtibwa Sugar, viungo Frank Damayo, Nizar Khalfan aliyekuwa anacheza Marekani, Said Bahanuzi kutoka Mtibwa Sugar na mshambuliaji Simon Msuva kutoka  Moro United.    

Lakini pia wataendelea kuwaona kiungo Athumani Iddi ‘Chuji’ na mshambujliaji Jerry Tegete ‘waliozaliwa upya’. Haruna Hakizimana Fadhil ‘Niyonzima’ tayari amerejea na hapana shaka atapewa nafasi leo uwanjani na hivyo kuongeza idadi ya mafundi kwenye kikosi cha Yanga.

Ni mamatarajio kwamba utakuwa mchezo mzuri na muhimu kwa klabu hiyo, kabla ya kushuka dimbani Jumamosi kupepetana na Athletico ya Burundi.

Tuesday, July 10, 2012