WACHEZAJI WETU WANAISHIA MWISHO WA MALENGO YAO

Jerry Tegete anafunga dhidi ya Express; Lakini hama malengo, anajichezea tu

JUZI niliandika kwa muhtasari kuhusu wachezaji wawili wa Tanzania, Danny  Davis Mrwanda na Nizar Khalfan, ambao kwa hakika kutokana na kuonekana wachezaji wenye malengo, wananifurahisha na nikasema kwamba wanafaa kuwa kioo cha wachezaji wengine wa Tanzania.

Na Mahmoud Zubeiry

Nilisema hawa jamaa ni wapiganaji, hawasiti kurudi nyuma kujipanga upya, mara wanapopoteza nafasi.

Sasa Danny amesaini Simba, akitokea Hoang Anh Gia Lai, aliyoichezea kwa msimu mmoja akitokea Dong Tam Long An, zote za Vietnam.

Ni huyu Danny ambaye mwaka 2004 alikwenda kufanya majaribio katika klabu ya Yanga, lakini pamoja na kufanya vizuri, enzi hizo akiitwa Okocha, akatemwa dakika za mwishoni, kocha wa Yanga wakati huo, Kenny Mwaisabula.

Danny alipotemwa Yanga dakika za mwishoni, akaenda Arusha kujiunga na AFC ya huko na msimu wa 2005 alicheza soka baab kubwa, hata akasajiliwa na Simba SC msimu uliofuata.

Alicheza Simba SC kwa mafanikio na msimu wake wa kwanza tu, aliitwa timu ya taifa ya Tanzania, Taifa Stars.

Mwaka 2008, Danny alinunuliwa na klabu ya Tadhamon ya Kuwait kwa pamoja na kiungo Nizar Khalfan. Mchongo waliupataje? Stars ilikwenda ziarani Saudi Arabia na ikiwa huko ndipo soka yao ikamvutia kiongozi mmoja wa klabu hiyo, akawanunua wote.

Lakini baada ya msimu mmoja, Danny hakuongezewa mkataba na klabu hiyo, hivyo akarejea nyumbani na kujiunga tena na Simba SC. Hakurudi kama amefika, au aliyekata tamaa, bali aliendelea na mikakati yake ya kutoka.

Alicheza Simba hadi 2010 alipopata ofa tena ya kwenda Vietnam ambako amecheza hadi msimu huu anarudi. Sitaki kuamini Danny amekuja kumalizia soka yake Simba SC. Naamini kama ilivyokuwa awali, amerudi kucheza nyumbani, baada ya kumaliza mkataba Vietnam, huku akitafuta nafasi nchi nyingine.

Kuna kitu Danny alipost kwenye page yake ya facebook wiki hii, kinachonifanya niamini huyu ni mchezaji anayejitambua na mwenye malengo. “U-superstar huwa ni feki...hung'arisha tu ukiwa na market, open your mind bongo superstars,” aliandika.

Kwa mtazamo huu, Danny anatembea akijua ana deni. Ana deni la kuhakikisha anakuwa na soko wakati wote. Na kama ni hivyo, Danny hawezi kubweteka, lazima atahakikisha siku zote anakuwa vema.

Kama mchezaji, Danny anatakiwa kuwa fiti wakati wote ili acheze vizuri. Na kucheza vizuri ndiko kutamfanya aendelee kuwa supa star na kupamba kurasa, kuanzia za blogs hadi magazeti. Kama mimi BIN ZUBEIRY, nafungua moyo wangu. Nampenda sana Danny, wakati wote kama mchezaji wa Kitanzania kioo cha wachezaji wengine. Nampenda Nizar Khalfan, ingawa sijamuelezea kwa undani hapa, lakini naye ana fikra sawa na za Danny.

Amekatishiwa mkataba Marekani, karudi Yanga kujipanga upya, kama tu alivyomaliza mkataba Kuwait, akarudi Moro United kujipanga. Maisha ukiyaonea noma, yanakutoa nishai kweli kweli.

Nizar Khalfan

Najua, kuna wachezaji walikwenda nje kucheza, ama wamekosa timu au wametemwa, lakini wanaona noma kurudi nyumbani kujipanga upya. Danny na Nizar hawana akili hiyo. Na watarudi tu juu.

Tatizo nini kwa wachezaji wetu?

Wachambuzi maarufu Tanzania wamekwishaandika sana na kila mmoja amejaribu kuelezea kiini cha tatizo kwa mtazamo wake.

Baada ya kipindi kirefu cha kufuatilia kwa kina na kufanya uchunguzi, nimegundua kwamba tatizo la wachezaji, kubwa ni kukosa malengo.

Wachezaji wetu wanakuwa na nia ya kufikia kucheza Simba au Yanga pekee, hawana ndoto za zaidi ya hapo na ndio maana kuvuka hapo limekuwa suala zito,

Katika maisha kila jambo linafanikiwa kutokana na malengo, ambayo yanatimia kutokana na mipango.

Kama mchezaji atakuwa ndani ya mipango, kwa mfano akiwa timu ya vijana U17, anasema kwanza anataka acheze hadi timu ya taifa ya wakubwa, awe ana namba ya kudumu kwenye kikosi cha kwanza.

Lazima atapambana kuhakikisha anafikia malengo yake na kwa sababu hiyo hawezi kubweteka hata kama atasajiliwa Simba au Yanga, atajua lazima kila siku ana deni la kufikia malengo yake.

Hatua ya pili, kama atajiwekea malengo kwa mfano, anataka kuwa mfungaji bora wa Ligi Kuu, kuwa mchezaji bora, basi lazima atapambana hadi atimize malengo yake. Atakuwa mshindani siku zote. Siku moja nilimuambia Jerry Tegete, kwamba yeye hana malengo, ndio maana japo anajua kufunga, lakini hajawahi kuwa mfungaji bora wa Ligi Kuu.

Nimekuwa nikimpigia sana kelele Tegete, lazima awe na malengo ili apambane kuyatimiza badala ya kujichezea tu. Mbona anafunga kwenye mechi za Simba? Si kwa sababu ana malengo hayo, basi akiamua angalau kila mechi afunge bao moja, ataweza na mwisho wa msimu atavaa kiatu cha dhahabu.

Tazama John Bocco ‘Adebayor’, miaka miwili iliyopita tayari nilijua siku moja atakuwa mfungaji bora wa Ligi Kuu, na kweli baada ya kuzidiwa na Boniphace Ambani, msimu wa kwanza, Mussa Mgosi msimu wa pili, Mrisho Ngassa msimu wa tatu, hatimaye msimu uliopita ametimiza malengo yake.

Tegete malengo yake yanaishia kuifunga Simba na ataendelea kuwafunga. Lakini kwa nini wachezaji wetu wawe na mitazamo finyu? Naamini umefika wakati wachezaji wetu wawe na mitazamo ya mbali zaidi.

Mrwanda na mwanawe, Jr.

Wawe na ndoto za kuishi maisha mazuri ya kifahari kupitia vipaji vyao. Leo Bocco amekwishakuwa mfungaji bora wa Ligi Kuu, sasa akijiwekea malengo, kwamba ndani ya misimu mitatu nataka niwe nacheza Ulaya, kama ataamua kupambana kuyatimiza, naamini atafanikiwa.

Tegete niseme nini, alipata nafasi Ulaya, akafanya majaribio akafuzu, lakini hayo hayakuwa malengo yake, malengo yake yalikuwa kucheza Yanga, hivyo akarudi Yanga.

Miaka ya 1990, kulikuwa kuna wachezaji wawili, Ally Yussuf ‘Tigana’ na Mwanamtwa Kihwelo, hawa hawakupenda kabisa kucheza Tanzania, ila kama Nizar na Mrwanda ilikuwa wakimaliza mikataba yao, wanaporudi nyumbani kusaini Simba au Yanga, basi wamerejea kujipanga na muda si mrefu wanaondoka tena.

Haruna Moshi 'Boban' hapa anacheza Geffle FF ya Ligi Kuu Sweden, lakini hakudumu kwenye klabu hiyo alirudi nyumbani, kwa sababu kucheza Ulaya kwenye fedha nyingi si malengo yake, malengo yake ni Simba ambako anajiona kama yuko 'peponi' hivi sasa.

Katika siku zijazo nitazungumzia pia, kwa nini baadhi ya wachezaji wa Tanzania hushindwa kucheza nje, ila kwa leo ili nieleweke vizuri naomba mada iwe hii tuu, wachezaji wetu wanaishia mwisho wa malengo yao na kama watapanua wigo wa malengo yao, basi watasonga mbele pia. Wasalam! 

Sunday, July 08, 2012