TFF YAMPONGEZA, MANJI NA JESHI LAKE

HONGERENI; Mwenyekiti mpya wa Yanga, Manji akiwa Makamu wake Clement Sanga

Na Prince Akbar

SHIRIKISHO la Soka Tanzania (TFF) limeupongeza uongozi mpya wa Yanga uliochaguliwa katika uchaguzi mdogo uliofanyika Julai 15, mwaka huu ukumbi wa Diamond Jubilee, Dar es Salaam.

Ofisa Habari wa Shirikisho la Soka Tanzania (TFF), Boniphace Wambura Mgoyo, ameiambia BIN ZUBEIRY mchana huu kwamba, ushindi waliopata wajumbe wapya sita waliochaguliwa kuingia kwenye Kamati ya Utendaji unaonesha jinsi ambavyo wanachama wa Yanga waliohudhuria uchaguzi huo walivyo na imani kwao.

Mume huyo wa Mwandishi wa gazeti la Mwanaspoti, Ndaya alisema, TFF inaahidi kuendeleza ushirikiano wake kwa Kamati ya Utendaji ya Yanga ambayo hivi sasa ina vinara wapya, na kwamba wana changamoto kubwa ya kuhakikisha wanaendesha shughuli za klabu hiyo kwa kuzingatia katiba na kanuni.

Pia tunatoa pongezi kwa Kamati ya Uchaguzi ya Yanga chini ya Jaji Mkwawa na Kamati ya Uchaguzi ya TFF inayoongozwa na Deogratias Lyatto kwa kuhakikisha uchaguzi huo unafanyika kwa utulivu na kwa kuzingatia katiba na kanuni.

Katika uchaguzi huo, Yussuf Manji alishinda Uenyekiti, Clement Sanga, Makamu na Aaron Nyanda, Abdallah Bin Kleb, George Manyama na Mussa Katabaro nafasi za Ujumbe wa Kamati ya Utendaji.

Uchaguzi huo, ulifuatia Wajumbe wengi wa Kamati ya Utendaji katika uongozi uliochaguliwa miaka miwili iliyopita, wakiwemo Mwenyekiti Wakili Lloyd Baharagu Nchunga na Makamu wake, Davis Mosha kujiuzulu.

Tuesday, July 17, 2012