SIMBA YATINGA FAINALI, KUMENYANA NA AZAM KESHOKUTWA

SHUJAA; Patrick Kanu Mbivayanga
mfungaji wa bao pekee

Na Prince Akbar

BAO pekee la kiungo wa kimataifa wa Jamhuri ya Kidemokrasia ya Kongo (DRC), Patrick Kanu Mbivayanga, usiku huu kwenye Uwanja wa Amaan, Zanzibar limetosha kuipeleka Simba SC, fainali ya Kombe la Urafiki.

Kanu, aliyeletwa kwa mabingwa hao wa Ligi Kuu na Mkongo mwenzake, marehemu Patrick Muteesa Mafisango, alifunga bao hilo dakika ya 57, akiunganisha krosi ya mshambuliaji wa kimataifa wa Zambia, Felix Mumba Sunzu Jr., aliyeingia kipindi cha pili kuchukua nafasi ya Salim Kinje.

Hadi mapumziko, hakuna timu iliyofanikiwa kuona lango la mwenzake na kipindi cha pili baada ya kocha Mserbia, Profesa Milovan Cirkovick kufanya mabadiliko, ndipo ushindi ukawezekana.

Dakika ya 85, Sabri Ramadhan ‘China’wa All Stars, alikwamisha mpira nyavuni, lakini refa akasema alikuwa ameotea.

Kwa matokeo hayo, Simba itacheza na Azam FC katika fainali keshokutwa, Uwanja huo huo wa Amaan.

Katika mchezo huo, kikosi cha Simba kilikuwa; Juma Kaseja, Shomary Kapombe, Amir Maftah, Lino Masombo/Juma Nyosso, Obadia Mungusa, Amri Kiemba, Mwinyi Kazimoto, Mussa Mudde, Abdallah Juma/Jonas Mkude, Kanu Mbivayanga/Haruna Moshi ‘Boban’ na Salim Kinje/Felix Sunzu.

Katika mchezo uliotangulia mapema jioni, mabao mawili ya mshambuliaji wa kimataifa wa Ivory Coast, Kipre Herman Tcheche, yalitosha kuivusha Azam FC hadi fainali ya michuano hiyo, baada ya kuwafunga mabingwa wa Zanzibar, Super Falcon 2-0 kwenye Uwanja huo huo wa Amaan, Zanzibar.

Tcheche alifunga bao la kwanza dakika ya 67, akiunganisha krosi ya Hamisi Mcha wakati bao la pili, alifunga kwa penalti, dakika ya 77, baada ya Samir Haji Nuhu kuangushwa kwenye eneo kla hatari na Samir Said dakika ya 77.

Katika mechi hiyo, Azam ilipata pigo dakika ya 54, baada ya mshambuliaji wake Gaudence Exavery Mwakimba kutolewa nje kwa kadi nyekundu dakika ya 54 kwa kumpiga kiwiko Abdul Ally.

Monday, July 09, 2012