SIMBA NA AZAM UWANJANI ZANZIBAR LEO

Kocha wa Simba SC, Mserbia Milovan Cirkovick kushoto, akiwa na bosi wake, Mwenyekiti wa Kamati ya Ufundi ya Simba SC, Ibrahim Masoud 'Maestro' 

Na Prince Akbar

MABINGWA wa Tanzania Bara, Simba SC leo wanafungua dimba na mabingwa wa Zanzibar, Mafunzo kwenye Uwanja wa Amaan, Zanzibar katika michuano ya Kombe la Ujirani Mwema, inayoandaliwa na Chama cha Soka Zanzibar (ZFA).

Aidha, washindi wa Medali ya Fedha ya Ligi Kuu ya Bara, Azam FC nao watacheza mechi yao ya ufunguzi dhidi ya timu ya taifa ya vijana chini ya umri wa miaka 23 ya Zanzibar (U23) kwenye Uwanja huo huo wa Amaan.

Kinara wa mabao wa Azam FC, John Bocco 'Adebayor'

Mechi kati ya Azam na U23, maarufu kama Karume Boys ndio itatangulia na mechi ya Simba itafuatia usiku kwenye Uwanja huo huo.

Tayari Azam wapo visiwani Zanzibar tangu jana, wakati Wekundu wa Msimbazi watapasua mawimbi mchana wa leo kuelekea visiwani humo.

Timu nyingine ya Bara iliyoalikwa kushiriki mashindano hayo, Yanga SC washindi wa Medali ya Shaba ya Ligi Kuu ya Bara walijitoa, kwa kuhofia wachezaji wake kuumia kabla ya kuanza Klabu Bingwa Afrika Mashariki na Kati, Kombe la Kagame.

“Mara nyingi tunapokwenda kwenye michuano ya Zanzibar, wachezaji wetu huumia, hivyo tunahofia hilo lisijitokeze tena wakati tuna wiki mbili tu kabla ya kuanza kutetea Kombe la Kagame,” alisema wiki iliyopita, Ofisa Habari wa Yanga, Louis Sendeu akitoa tamko la klabu hiyo kujitoa.

Wakati michuano ya Ujirani Mwema ilianza jana visiwani Zanzibar, Kombe la Kagame linatarajiwa kuanza Julai 14, Yanga ikifungua dimba na Atletico ya Burundi.

Timu nyingine katika Kundi A mbali na Simba ni Azam, Mafunzo na U23.

Monday, July 02, 2012