SIMBA, AZAM TAYARI WAPO DAR WAKIWINDANA

Lino Masombo, beki wa Simba SC

Na Prince Akbar

KLABU za Simba na Azam zitakazomenyana katika fainali ya Kombe la Urafiki kesho saa 1:00 usiku Uwanja wa Taifa, Dar es Salaam tayari zimerejea Jijini kutoka visiwani Zanzibar walipocheza hatua za awali za michuano hiyo, inayoandaliwa na Chama cha Soka Zanzibar (ZFA).

Timu zote zilirejea Dar es Salaam saa 12 jioni na kuelekea kwenye kambi zao, tayari kwa maandalizi ya mchezo huo.

Daktri wa Simba SC, Cossmas Kapinga ameiambia BIN ZUBEIRY asubuhi ya leo kwamba, amefurahia mechi hiyo kurejeshwa Dar es Salaam, kwani kwa Uwanja Amaan kutokana na jinsi ulivyo mbovu, kulikuwa kuna hatari ya wachezaji wake kuumia zaidi.

“Kila mchezaji katika timu yetu, analalamika anaumwa kifundo cha mguu, ila ni maumivu madogomadogo na wote wanaendelea na mazoezi, lakini kwa mchezo mkubwa kama huo ilikuwa ni hatari sana, maana kwanza wangecheza kwa woga na wangeweza kuumia zaidi, ukizingatia kila timu inaingia kwenye Kombe la Kagame,”alisema Dk Kapinga.

Simba wanatarajiwa kufanya mazoezi mepesi kwenye Uwanja wa TCC, Chang’ombe, Dar es Salaam jioni ya leo, wakati Azam watajifua uwanjani kwao, Chamazi.

Fainali ya Kombe la Urafiki baina ya timu hizo, sasa itachezwa Uwanja wa Taifa, Dar es Salaam Alhamisi na itasimamiwa na kampuni ya Prime Time Promotions, wamiliki wa Clouds Media Group.

Msemaji wa Chama cha Soka Zanzibar (ZFA), Munir Zakaria aliiambia BIN ZUBEIRY jana kwamba mazungumzo yanaendelea kuhusu mustakabali wa mechi hiyo, lakini kwa sasa jukumu la promosheni ya mechi wamekabidhiwa Prime Time.

Munir alisema sababu za mechi hiyo kuhamishiwa Dar es Salaam ni kwamba Simba na Azam zimeukataa Uwanja wa Amaan kwamba ni mbovu na wachezaji wake wanaumia.

Mapema jana, kocha wa Azam FC, Stewart Hall kutoka Uingereza alisema ana matumaini ya kuwafunga Simba SC kwenye fainaili, wakati mpinzani wake Mserbia Profesa Milovan Cirkovick alimjibu kwamba anajidanganya.

Nyota wa Azam; Abdi Kassim 'Babbi' na Abdulhalim Humud

Stewart alisema baada ya ushindi wa 2-0 jana dhidi ya mabingwa wa Zanzibar, Super Falcon na kutinga fainali, sasa ni zamu ya mabingwa wa upande wa pili wa Muungano, Simba SC nao kula kichapo.

Lakini Stewart alikiri kwamba Simba, mabingwa wa Bara ni timu nzuri na mchezo utakuwa wa ushindani, lakini mwisho wa siku, Azam watang’ara.

Stewart alisema wachezaji wake aliowapa mapumziko kama Mrisho Khalfan Ngassa na John Raphael Bocco ‘Adebayor’ wataendelea kuwa watazamaji, kwani ataendelea na kikosi kile kile kilichomfikisha hapa.

Kwa upande wake, Milovan alisema tangu wanapanda boti kwenda Zanzibar alijua tu fainali itakuwa kati ya timu yake na Azam kwa sababu hizo kwa sasa ndizo timu bora Tanzania.

“Sisi mabingwa, wao wa pili kwenye Ligi, hao ndio wapinzani wetu. Hatuwezi kuukwepa ukweli huo. Ila wataendelea kuwa wa pili hata baada ya dakika 90,”alisema Milovan.

Milo alisema amewaona Azam wakicheza Zanzibar na anakiri ni timu nzuri, lakini ya kiwango cha kuisumbua tu Simba SC si kuizuia kushinda.

Azam walikuwa wa kwanza juzi kujikatia tiketi ya kuingia fainali, baada ya kuifunga Falcon 2-0, mabao yote yakitiwa kimiani na mshambuliaji wa kimataifa wa Ivory Coast, Kipre Herman Tcheche Uwanja wa Amaan, Zanzibar.

Wednesday, July 11, 2012