NGORONGORO NA NYIGU WADOGO TENA LEO

Christopher Edward wa Ngorongoro

Na Princess Asia

TIMU ya soka ya taifa ya vijana wenye umri chini ya miaka 20, Ngorongoro Heroes leo inashuka dimbani kucheza na Rwanda 'Nyigu Wadogo' Uwanja wa Taifa, Dar es Salaam katika mchezo wa kirafiki wa kimataifa, ambao ni wa marudiano ndani ya siku tatu.

Mechi hiyo ya kujipima nguvu kwa Ngorongoro Heroes inayofundishwa na Kocha Jakob Michelsen kabla ya kucheza na Nigeria katika mechi za mchujo za michuano ya Afrika itaanza saa 10 kamili jioni.

Ngorongoro Heroes ambayo katika raundi ya kwanza ya michuano hiyo iliitoa Sudan itacheza mechi ya kwanza ya raundi ya pili Julai 29 mwaka huu dhidi ya Nigeria kwenye Uwanja wa Taifa, Dar es Salaam.

Rwanda ambayo inaundwa na wachezaji wengi waliocheza fainali za Kombe la Dunia kwa vijana wenye umri chini ya miaka 17 miaka mitatu iliyopita tayari, mechi ya kwanza juzi Uwanja wa Chamazi, iliifunga Ngorongoro 1-0.

Viingilio katika mechi hiyo vitakuwa sh. 2,000 kwa viti vya rangi ya chungwa, bluu na kijani wakati VIP B na C itakuwa sh. 5,000. Kiingilio kwa VIP A itakuwa sh. 10,000.

Monday, July 16, 2012