'NEW GABRIEL' AING'ARISHA SIMBA ZANZIBAR, KANU NI BALAA TUPU

Kikosi cha Simba kilichocheza na Express jana na kutoka sare ya bila kufungana. Abdallah Juma wa kwanza kushoto waliosimama.

Na Prince Akbar

WEKUNDU wa Msimbazi, Simba SC wameanza vyema michuano ya Kombe la Urafiki, baada ya kuwafunga wenyeji Mafunzo mabao 2- kwenye Uwanja wa Amaan, Zanzibar.

Nyota wa mchezo wa leo, alikuwa ni mshambuliaji mpya wa Wekundu hao wa Msimbazi, Abdallah Juma ambaye alifunga mabao yote hayo.

Abdallah Juma, ambaye amepokewa Simba kama Emmanuel Gabriel mpya, alifunga bao la kwanza dakika ya 27 akiunganisha pasi muruwa ya Patrick Kanu Mbivayanga dakika ya 27.

Mshambuliaji huyo mrefu kutoka Ruvu Shooting ya Pwani, alifunga bao la pili dakika ya 44 kwa kichwa, akiunganisha pasi ya Mbiyavanga tena, kiungo kutoka Jamhuri ya Kidemokrasia ya Kongo (DRC).

Mafunzo walipata bao lao dakika ya 80, mfungaji Jaku Joma.

Katika mchezo wa leo, kwa mara ya kwanza mshambuliaji Danny Mrwanda aliichezea Simba tangu asajiliwe tena mwezi uliopita akitokea Dong Tam Long An ya Vietnam.

Simba, mabingwa wa Tanzania walichezesha kikosi chao kamili, ingawa Emmanuel Okwi, Felix Sunzu na Haruna Moshi ‘Boban’ wameendelea kukosekana.  

Simba; Juma Kaseja, Haruna Shamte, Amir Maftah/Paul Ngalema, Lino Masombo, Shomary Kapombe, Amri Kiemba, Danny Mrwanda/Mwinyi Kazimoto, Mussa Mudde/Paul Ngalema, Abdallah Juma/Uhuru Suleiman, Kanu Mbivayanga/Haroun Othman na Kiggi Makassy.

Mafunzo: Suleiman Janabi, Hajji Abdi, Ally Juma, Yussuf Makame, Said Mussa, Juma Othman, Abdulrahim Mohamed, Suleiman Kassim ‘Selembe’, Ismail Khamis, Juma Jaku na Ally Othman.

Monday, July 02, 2012