MTAALAMU SURE BOY AONGEZA AZAM KAGAME

Cheki shughuli yake Sure Boy...Dogo anatisha

Na Prince Akbar

KIUNGO wa Azam FC, Salum Abubakar ‘Sure Boy Jr.’aliyekuwa majeruhi amepona na ataichezea timu hiyo katika michuano ya Klabu Bingwa ya soka Afrika Mashariki na Kati, maarufu kama Kombe la Kagame, inayoendelea Dar es Salaam.

Katibu Mkuu wa Azam FC, Nassor Idrisa ameiambia BIN ZUBEIRY leo kwamba, Sure Boy hivi sasa yuko fiti kwa asilimia 100 na amerejea kwenye programu ya kocha Muingereza, Stewart Hall.

Mtoto huyo wa winga wa zamani wa kimataifa Tanzania, Abubakar Salum ‘Sure Boy’, aliumia mwezi uliopita kwenye kambi ya timu ya taifa, Taifa Stars iliyokuwa inajiandaa na mechi dhidi ya Msumbiji kuwania tiketi ya kucheza Fainali za Mataifa ya Afrika mwakani. Stars ilitolewa.

Kuumia kwa Sure lilikuwa pigo si kwa klabu yake tu, bali hata timu ya taifa, ambako anacheza kwa uelewano mkubwa na kiungo wa Yanga, Frank Damayo. Vivyo, hivyo kurejea kwake ni faraja kwa Azam na Stars, inayofundishwa na Mdenmark Kim Poulsen.

Azam iliyoanza kwa sare ya 1-1 na Mafunzo Jumapili, itarejea uwanjani Julai 21, kumenyana na Tusker FC ya Kenya na tunatarajia ‘mavituuz’ adimu kutoka kwa ‘maji yaliyofuata mkondo’.

Tuesday, July 17, 2012