MRWANDA ALIA HALI YA HEWA, UHURU AKESHA AKIUGULIA KIPIGO

Danny Mrwanda

Na Princess Asia

MSHAMBULIJI wa Simba SC, Danny Mrwanda amewapoza mashabiki wa timu hiyo, baada ya kipigo cha jana cha mabao 2-0, kutoka kwa URA ya Uganda katika Klabu Bingwa Afrika Mashariki na Kati, Kombe la Kagame akisema kwamba safari bado ndefu na mashabiki wasife moyo.

Mrwanda ameiambia BIN ZUBEIRY kwamba kwa hali na mali, lengo lake ni kuisaidia timu ishinde, lakini anasikitika hali ya hewa ilimsumbua sana jana hata akashindwa kutimiza lengo hilo.

“Kwa hali na mali, lengo langu ni kuisaidia timu ishinde, kwangu hali ya hewa ilikuwa kikwazo, safari bado ni ndefu, msife moyo wana Simba, mazuri yaja,”alisema Mrwanda

Uhuru Suleiman

Kwa upande wake, kiungo wa Simba SC, Uhuru Suleiman amesema kwamba hakupata usingizi usiku wa jana kutokana na kuumizwa kipigo hicho.

“Kiukweli usiku wote wa jana kila nikigeuza ubavu, naiona game tuliyofungwa jana, hivyo naamini mpo mlioumia kama mimi, hivyo niwatake radhi mashabiki wote kwa kupoteza mchezo ule, naamini tutafanya vizuri katika michezo ilyobakia, ahsanteni kwa umoja wenu,”alisema Uhuru.

Simba ilianza vibaya jana Klabu Bingwa Afrika Mashariki na Kati, Kombe la Kagame, baada ya mabao mawili ya Feni Ally dakika ya 11 na 90+2 kuwanyamazisha 2-0.

Katika mchezo huo, Simba ilicheza vizuri, lakini tu walishindwa kutumia vizuri nafasi walizopata na mabao yote walifungwa wakitoka wao kushambulia.

Simba watacheza tena keshokutwa dhidi ya Ports ya Djibouti iliyofungwa 7-0 na Vita Club ya Jamhuri ya Kidemokrasia ya Kongo (DRC) katika mchezo wa kwanza, mechi ambayo itatanguliwa na mchezo kati ya Vita Club na URA ya Uganda.

Monday, July 16, 2012