FELIX MUMBA SUNZU JR. ANA TATIZO GANI JAMANI?

Na Mahmoud Zubeiry

FELIX Mumba Sunzu Jr. anaonekana kutokuwa vizuri kwa sasa kutokana na kiwango chake katika Klabu Bingwa Afrika Mashariki na Kati, Kombe la Kagame, inayoendelea Dar es Salaam, kiasi cha kushindwa kuisaidia klabu yake, Simba SC.

Kwa mara nyingine, jana Sunzu aliwadhihirishia wapenzi wa Simba hayuko tayari kucheza- baada ya kupoteza nafasi nyingi, tena za wazi za kufunga.

Hayuko fiti? Hapana, yuko fiti ndio maana anamudu dakika 90, anahaha uwanja mzima, anafungua pembeni, anakimbia, anarudi kusaidia ulinzi- lakini inaonekana tatizo lipo kichwani mwake na si mwilini.

Kuna matukio matatu jana yanaweza kuwa mfano kama ana matatizo kichwani; moja ni pasi tatu za mwisho nzuri alizopata kipindi cha kwanza, baada ya kujiweka mwenyewe kwenye nafasi, lakini akiwa anatazama na kipa, alishindwa kufunga.

Sunzu katika mechi na Yanga msimu uliopita, alikuwa moto 

Alishindwa kumsoma kipa na lango lake, akajipigia tu kwa kubahatisha. Hakuiruhusu akili yake kufanya kazi. Kipindi hicho hicho cha kwanza, alijiweka kwenye nafasi ya kuomba basi akiwa kwenye eneo la hatari la wapinzani, lakini pasi ilimgonga mguuni na kuondoka, akibaki anasikitika.

Kipindi cha pili kadhalika, Sunzu alipoteza nafasi nyingine mbili za wazi- kabla ya kufunga kwa penalti. Huyu siye Sunzu tunayemjua, mfungaji bora wa zamani wa Kombe la Mataifa ya Afrika Mashariki na Kati, Challenge.

Haiingii akilini Sunzu hayuko fiti- hapana ana tatizo labda linalomuathiri kisaikolojia na unaweza kuwaza mambo mengi, kwa sababu mchezaji naye ni binadamu. Labda kifo cha marehemu Patrick Mafisango, aliyekuwa rafiki yake na waliyekuwa wakicheza naye kwa uelewano mkubwa msimu uliopita.

Kumbuka; Sunzu mama yake ni raia wa Jamhuri ya Kidemokrasia ya Kongo (DRC) na baba yake ndiye Mzambia na marehemu Mafisango alikuwa Mkongo pia. Lakini labda inawezekana Sunzu ana tatizo lingine tu kichwani mwake, ambalo linamuathiri kisaikolojia kwa sasa.

Wangapi miongoni mwetu wapenzi wa soka wanakwenda ofisini kufanya kazi wakiwa wana matatizo kichwani na matokeo yake ufanisi unakuwa duni? Wachezaji nao ni binadamu. Kwangu Sunzu ni mshambuliaji hatari- lakini naamini kwa sasa hayuko sawa kisaikolojia, tatizo ambalo limekuwa likiwaathiri wachezaji wengi duniani.

Wakati mwingine hata mchezaji kutotimiza ndoto zake, humuathiri kisaikolojia. Kama kuna mtu aliyekuwa naye kwenye kikosi cha Zambia katika Fainali za Mataifa ya Afrika mwaka 2008 ambaye kwa sasa anacheza Ulaya, hilo linaweza likawa linamuumiza kichwa pia Sunzu.

Kumbuka mchezaji huyu wa zamani wa Konkola Blades ya Zambia na anayeichezea pia timu ya taifa ya nchi hiyo, Chipolopolo, aliachwa na Al Hilal ya Sudan wakati huo ikiwa chini ya Milutin Sredojevic ‘Micho’ ikiwa ni miezi sita tu tangu asajiliwe.

Al Hilal waliamua kuvunja mkataba na Sunzu, baada ya mshambuliaji huyo kudaiwa kuonyesha kiwango kibovu na kuzidiwa ujanja na Mzimbabwe Sadomba, aliyeonekana kufumania mno nyavu.

Sunzu Jr alionwa na Micho, baada ya kuonyesha kiwango kikubwa katika michuano ya Kombe la Challenge mwaka 2010, na kuwa mfungaji bora akiichezea Zambia.

Kwa muda Sunzu, anaonekana kama anayehangaika barabarani na kushindwa kutulia katika timu moja kwani baada ya kuwemo katika kikosi cha Zambia 2008, alichukuliwa na Al Masry ya Tunisia, ambako nako alitemwa kwa sababu kama hizo.

Felix Mumba Sunzu Jr. akiwa na Obadia Mungusa

Aliporudi Zambia, aliamua kujiunga na timu ya nyumbani kwao ya Konkola Blades, lakini akaondoka na kwenda kujiunga na Lupopo ya Lubumbashi, mwaka 2010 na yalipomshinda alirejea tena Konkola Blades kwa mara ya tatu.

Katika michuano ya Kombe la Challenge, Sunzu akaonyesha kiwango kikubwa na kufanikiwa kufunga mabao matano, hivyo kuivutia Al Hilal iliyoamua kumchukua.

Sunzu akajumuishwa katika ziara ya timu ya taifa katika nchi za Misri na Israel kabla ya kuchukuliwa na Al Hilal, huku kukiwa na madai TP Mazembe nayo ilikuwa inamtaka, timu ambayo anachezea pia ndugu yake, beki, Stopilla.

Baada ya Al Hilal kumtema, Simba ikaingia kati na kuanzia kumfuatilia mshambuliaji huyo na kumtwaa.

Msimu uliopita alianza vizuri na alikuwa ana mchango mkubwa katika mataji matatu iliyotwaa Simba, kuanzia Ngao ya Jamii, Ligi Kuu na hata Kombe la Urafiki, lakini sasa dalili za kile kilichofanya atemwe El Hilal zinaanza kuonekana katika Kagame.

Sunzu anaboronga uwanjani, wakati mshambuliaji mpya Abdallah Juma anafanya vitu.

Sunzu wa Kagame 2012; Hapa ni baada ya kukosa bao la wazi akiwa anatazama na nyavu

SIMBA WAFANYE NINI?

Klabu zetu katika mfumo wake wa utawala, zinakosa mtu mmoja muhimu sana- mtaalamu wa saikolojia. Huyu ndiye anayeweza kumrudisha uwanjani Sunzu kwa sasa.

Mtu mwenye tatizo la kisaikolojia kumfokea, kumkaripia kumuadhibu ni kuzidi kumwathiri- mtu wa aina hiyo ni wa kuzungumza naye taratibu, ili kujua kinachomsibu.

Unaketi naye, unazungumza naye kirafiki- kwa kumteka unamsimulia mambo yako- hata matatizo ya kifamilia, au matukio yoyote yanayohusu maisha- ili kumteka na kumfanya naye akusimulie ya kwake.

Hapo unaweza kugundua tatizo lake, na mwisho wa siku ikawa rahisi kumsaidia. Kumuwakia mtu wa aina hiyo, ni kuzidi kumchanganya- alilonalo kichwani hajajua atalitatua vipi, unamuongeza linguine, tena ambayo yote yanahusu mustakabali wa maisha yake.

Kuna wakati niliwahi kuandika nikiwa pale DIMBA, kuhusu Haruna Moshi Shaaban ‘Boban’, kwamba kumsimanga si kumsaidia- wakati huo kocha wa timu ya taifa alikuwa Jan Poulsen.

Boban anajiamini ana uwezo na ndio maana anachezea Simba Dar es Salaam hadi Setif- Jan Poulsen akamuomba achezee U23 ili aone kiwango chake kama anastahili jezi ya timu ya taifa, akagoma akidhani amedharauliwa.

Wachambuzi wetu wa kibongo, walimkandia kinoma- mi nikasema lazima tutafute njia mbadala ya kumkabili Boban na si kumsusa, kwani kijana anaonekana ana tatizo la kisaikolojia.

Vipi sasa Stars ikiwa chini ya Kim Poulsen, Boban alifanyiwa majaribio wapi ili kupewa jezi? Tazama kijana anavyobadilika taratibu, jana nimemshuhudia Boban anakwenda kukaba na hadi kupokonya mpira baada ya kupoteza.

Kwa hiyo nachowaambia Simba, walifanyie kazi suala la Sunzu. Huyo bado ni mchezaji mzuri na kijana mdogo, kwani alizaliwa Mei 2, 1989 katika mji wa Chingola nchini Zambia..

Sunzu alianza maisha ya soka kwa kuichezea Afrisport F.C na mwaka 2005 alijiunga na timu aliyoichezea baba yake ya Konkola Blades, lakini baada ya mwaka mmoja wa kuichezea timu ya vijana mwaka 2007 akapandishwa hadi timu ya wakubwa.

Katika msimu wake wa kwanza aliichezea Konkola Blades mechi 25 na kufunga mabao 15, lakini Februari 2007 akachukuliwa kwa mkopo na timu ya AS Marsa, ambapo alicheza mechi 16 na kufunga mabao mawili katika Ligi Kuu ya Tunisia.

Lakini Juni 2008 akarudi Konkola Blades lakini Septemba 2, 2008 akapelekwa kwa mkopo katika timu ya LB Chateauroux inayoshiriki Ligi Daraja la Pili Ufaransa kwa muda wa mwaka mmoja.

Julai 2009 akarudi AS Marsa ambaye alicheza Oktoba 29, kabla ya timu hiyo kuamua kuachana naye, ambapo akiwa hapo alicheza mechi mbili tu. Na si kwa Simba, klabu zetu zote, hasa zile kubwa, Azam na Yanga pia, wawe na wataalamu wa saikolojia kwa ajili ya wachezaji wao. Kituo.  

Sunzu baada ya kuwaliza Yanga mechi ya Ngao, msimu uliopita

Thursday, July 19, 2012