AZAM NA SIMBA NANI MKALI LEO ZANZIBAR?

Kocha wa Azam, Muingereza Stewart Hall,
ataendelea kuwa simu ya vigogo wa soka Tanzania?

Na Prince Akbar

MICHUANO ya Kombe la Urafiki, inayondaliwa na Chama cha Soka Zanzibar, inatarajiwa kuendelea leo kwa mchezo mkali na wa kusisimua kati ya mabingwa wa Tanzania Bara, Simba SC na Azam FC kwenye Uwanja wa Amaan, Zanzibar.

Mchezo huo wa Kundi A unatarajiwa kuwa mkali na wa kusisimua kutokana na ukweli kwamba Azam ndio washindi wa pili wa Ligi Kuu.

Aidha, mechi baina ya timu hizo siku za karibuni zimekuwa zenye upinzani mkali na ikizingatiwa timu zote zitashiriki Klabu Bingwa Afrika Mashariki na Kati, Kombe la Kagame- basi kila upande utataka kuwatia moyo mashabiki wake.

Ofisa Habari wa Simba SC, Ezekiel Kamwaga ‘Mr. Liverpool’ alisema jana kwamba wana matumaini ya kuifunga Azam FC leo, ili wawadhihirishie wao ndio ‘Baba ya soka Tanzania’.

Kwa upande wake, Katibu wa Azam FC, Nassor Idrisa alisema nao wako vizuri na wamejipanga vema kuifunga Simba SC.

Katika mechi yake ya kwanza juzi, Simba SC ilianza vyema baada ya kuifunga Mafunzo mabao 2-1, wakati Azam ililazimishwa sare ya 1-1 na U23, Karume Boys.

Mabao yote ya Wekundu wa Msimbazi yalitupiwa nyavuni na mshambuliaji mpya, aliyesajiliwa kutoka Ruvu Shooting ya Pwani, Abdallah Juma, ambaye amepokewa Simba kama Emmanuel Gabriel mpya. Dullah alifunga mabao hayo dakika ya 27 na 44, yote akiunganisha pasi za kuingo kutoka Jamhuri ya Kidemokrasia ya Kongo (DRC), Patrick Kanu Mbivayanga, wakati Mafunzo walipata bao lao kufutia machozi dakika ya 80, mfungaji Jaku Joma.

Azam wao juzi walilazimika kusubiri hadi dakika ya 79 kupata sare ya 1-1 kwa bao la mshambuliaji wake kutoka Ivory Coast, Kipre Tcheche, baada ya Karume Boys kupata bao la kuongoza dakika ya 45 kwa njia ya penalti, mfungaji Ibrahim Hamisi.

Katika mechi za kwanza za Kundi A jana, Yanga ya Dar es Salaam pia, ilifungwa kwa taabu mabao 3-2 na Jamhuri ya Pemba kwenye Uwanja wa Amaan, Zanzibar.

Yanga ambayo imepeleka wachezaji wake wa kikosi cha vijana visiwani humo, hadi mapumziko, ilikuwa tayari nyuma kwa mabao 2-1.

Lakini kipindi cha pili, Yanga B walikuja juu na kucheza soka ya kuvutia, ingawa waliishia kukosa mabao ya wazi kabla ya kupata moja na wapinzani wao wakipata moja zaidi pia .

Kocha wa Simba, Mserbia Milovan Cirkock,
ataendelea kucheka leo> 

Mabao ya Jamhuri yalitiwa kimiani na Ally Salum dakika ya 34, Abdallah Othman dakika ya 45 na Mohamed Omar dakika ya 69, wakati mabao ya Yanga yalifungwa na Hamisi Shaaban dakika ya 17 na Nofteli Mwansasu dakika ya 77.

Katika mchezo wa Kundi hilo uliotangulia hiyo jana, Super Falcon ilitoka sare ya kufungana mabao 2-2 na Zanzibar All Stars. Mabao ya Falcon yalifungwa na Deo Cassian dakika ya 12 na 25, wakati ya All Stars yalitupiwa nyavuni na Ahmad Malik dakika ya 46 na Twaha Mohamed dakika ya 81.

Wednesday, July 04, 2012