ADEBAYOR WA CHAMAZI AWATULIZA MASHABIKI AZAM

Kikosi kamili cha Azam 2012, Bocco wa kwanza kabisa kushoto mstari wa nyuma kabisa

Na Prince Akbar

MSHAMBULIAJI wa Azam FC, John Bocco ‘Adebayor’, amewapoza mashabiki wa klabu hiyo kwa kuanza na sare ya 1-1 na Mafunzo ya Zanzibar katika Klabu Bingwa Afrika Mashariki na Kati, Kombe la Kagame kwa kusema kwamba wamejifunza kutokana na na makosa na sasa watapigana kufa na kupona katika mchezo ujao dhidi ya Tusker ya Kenya.

Bocco ameiambia BIN ZUBEIRY kwamba, mashabiki wa Azam wanatakiwa kutulia na kuendelea kuiunga mkono timu yao na matokeo mazuri yanakuja.

“Kwa kweli tumeumia sana kwa sare hii, sisi kama wachezaji tumesikitika zaidi kuwaumiza mashabiki wetu ambao walitarajia tutashinda, tena ushindi mnono, lakini jamaa walikamia sana na mchezo ulikuwa mgumu kwa kweli.

Ila tunawaahidi mashabiki wetu, tumejifunza kutokana na makosa na sasa mechi ijayo na Tusker waje kuona nini tutafanya, yaani akili hiyo ni ya kila mchezaji, tutapigana kwa nguvu zetu zote ili kujenga imani kwa mashabiki wetu,”alisema Bocco, mfungaji bora wa Ligi Kuu.

Bocco ndiye aliyeifungia bao Azam katika mchezo huo wa jana wa sare ya 1-1 na mapema tu alisema anataka kuwa mfungaji bora wa michuano hiyo.

Katika mchezo mwingine wa jana, URA ya Uganda iliichapa timu nyingine ya Tanzania, Simba SC mabao 2-0, wakati juzi mabingwa watetezi, Yanga nao walipigwa 2-0 na Atletico FC ya Burundi Uwanja wa Taifa, Dar es Salaam.

Azam itarejea uwanjani Julai 21, kumenyana na Tusker FC ya Kenya wakati Yanga itamenyana na Waw Salaam ya Sudan Kusini kesho, mechi itakayotanguliwa na mchezo kati ya Atletico na APR ya Rwanda, iliyowafunga Wasudan 7-0 katika mchezo wa kwanza.

Simba watacheza tena keshokutwa dhidi ya Ports ya Djibouti iliyofungwa 7-0 na Vita Club ya Jamhuri ya Kidemokrasia ya Kongo (DRC) katika mchezo wa kwanza, mechi ambayo itatanguliwa na mchezo kati ya Vita Club na URA ya Uganda.

Monday, July 16, 2012