ABDALLAH ANAJUA, TEGETE TUNAJUA ANAJUA, MSUVA SAAAFI, SASA?

Na Mahmoud Zubeiry

MWISHONI mwa wiki zilichezwa mechi mbili za kirafiki, watani wa jadi katika soka ya Tanzania, Simba na Yanga wakimenyana na mabingwa wa Uganda, Express ‘Red Eagles’.

Mechi ya kwanza Jumamosi, Yanga ilishinda mabao 2-1, wakati mechi iliyofuata Jumapili, Simba ililazimishwa sare ya bila kufungana.

Katika mechi zote mbili, safu za ushambuliaji za klabu hizo za Tanzania ziliongozwa na washambuliaji wazawa- upande wa Simba Abdallah Juma na Christopher Edward na kwa Yanga Jerry Tegete na Simon Msuva.

Timu zote zilirundika viungo wengi- lakini angalau Yanga ilicheza na washambuliaji wawili, Tegete na Msuva, lakini Simba alianza Abdallah Juma pekee.

Yanga walicheza vema kipindi cha kwanza, ingawa kulikuwa kuna mapungufu kidogo ambayo yanatokana na dhahiri klabu hiyo kutokuwa na mwalimu kwa sasa.

Nasema mwalimu, kwa maana ya mwalimu wa kiwango cha juu- kwa sasa bado ni mapema sana kwa Freddy Felix Minziro kuimudu timu kama Yanga.

Matarajio ya wana Yanga, kocha wao mpya kutoka Ubelgiji, Thom Saintfiet atawasili leo kusaini mkataba na moja kwa moja kuanza kazi.

Simba, iliyoongozwa na kocha wake Mserbia, Milovan Cirkovick kama kawaida ilicheza soka yake ya kugonga pasi nyingi na hawakuwa tishio mbele ya safu ya ulinzi ya Waganda.

SIMBA WAMELAMBA DUME

Lakini bado ilitosha kujua kwamba Simba wamepata mshambuliaji bora, ambaye kama watampa sapoti ya kutosha, atakuwa siyo tu tegemeo la klabu yake, bali hata timu ya taifa.

Naomba nisema Abdallah anajua. Abdallah ana umbo zuri. Abdallah Simba wamelamba dume, kama wataamua kuwekeza kwake.

Nasema kuwekeza kwa sababu, Abdallah ana mapungufu ambayo yanahitaji kufanyiwa kazi ili baada ya miezi michache awe mshambuliaji ambaye makipa watalala wanamuota.

Ni mrefu, lakini ni mwembamba sana kwa sababu hana mazoezi ya kutosha ya kujenga mwili na lishe bora.

Katika eneo hilo, kijana anahitaji kuwekewa programu nzuri ya mazoezi ya gym na lishe bora.

Anaujua mpira, ana maarifa ya kuwatoka mabeki- lakini kwa alivyo sasa atakuwa akiwatoka akina Aggrey Morris tu, mbele ya mabeki madhubuti wa Kaskazini au Magharibi, hatafua dafu.

Kwa nini? Hana mbinu za kutosha na uzoefu pia.

Vinauzwa wapi hivyo? Hakuna popote, bali vinapatikana kwa njia moja kubwa, kupewa muda wa kuukusanya uzoefu uwanjani, huku kila baada ya mechi kocha akimuambia mapungufu yake ayafanyie kazi.

Lakini haitakuwa vibaya pia kwa Simba wakiamua kumpa mmoja wa washambuliaji wake nyota wa zamani kazi ya kuwanoa washambuliaji wao wa sasa, akiwemo Abdallah ambaye katika taswira yake unaweza kumuona mshambuliaji bora wa baadaye Tanzania.

Wenzetu katika klabu pamoja na kuwa na kocha Mkuu na Msaidizi wake, wana makocha wa makipa, mabeki, viungo na washambuliaji pamoja na wataalamu wa saikolojia.

Lakini sisi tunapenda kurahisisha mno- akiajiriwa Kocha Mkuu na Msaidizi wake, ukimkuta kocha wa makipa ni bahati na zaidi hiyo imekuja miaka ya karibuni katika klabu zetu.

Na ndiyo maana kila baada ya msimu vikosi vinajengwa upya kwa kusajiliwa wachezaji wapya lukuki na inasikitisha miaka inakatika bado hatujifunzi.

Haiwezekani kila unapowadia muda wa kusajili klabu ibomoe benki kusajili lundo la wachezaji wapya- lazima ufike wakati tufikirie kutengeneza timu.

Lazima tuendeshe mambo kitaalamu, tujifunze kuinua viwango vya wachezaji wetu na si kuwatekeleza kama ilivyo sasa.

Huyu Abdallah kama angetaka kuibukia Simba, basi sasa hivi zamani amekwishasahaulika katika soka ya nchi hii kama ilivyokuwa kwa Iddi Mbaga Yanga.

Lakini amepitia klabu mbalimbali, ambako alivumiliwa hadi kuonekana Simba.

Ila bado Abdallah anakabiliwa na changamoto kubwa hadi kujihakikishia yeye ni mshambuliaji wa Simba- kwani Felix Sunzu mwenye namba yake hajarejea. Akirudi Sunzu, akaendelea kuwa kauka nikuvae (kila mechi anacheza yeye), ina maana mwisho wa msimu Geoffrey Nyange ‘Kaburu’ atasajili kipya kipya na Dullah atatolewa kwa mkopo sijui wapi.

Bado kuna Danny Mrwanda, ambao wote anatakiwa kupambana nao ili kucheza- zaidi ya hapo haitakuwa ajabu naye akifuata nyayo za Mohamed Kijuso.

Nawaambia kitu kimoja Simba, wawekeze kwa huyo kijana na baada ya msimu mmoja tu watakuwa na lulu kikosini.

Lakini kwake pia Abdallah, anatakiwa kujitambua, kuwa na malengo ya kufika mahali fulani. Asijione kuvaa jezi nyekundu yenye nembo ya Kilimanjaro Beer ndio amemaliza. Hapana, na akiona amemaliza na kweli ataisha mapema na kusahaulika kabisa.

Siku zote tatizo la wachezaji wengi wa Tanzania ni kutojitambua na kukosa malengo pia na ndiyo maana hawafiki mbali, wanabaki tu kushikana uchawi wenyewe kwa wenyewe, eti wanalogana.

Makamu Mwenyekiti wa Simba SC, Kaburu akimfuatilia gym Abdallah Juma. Programu hii inatakiwa kuendelea kwa kijana huyu pamoja na kuhakikisha anapatiwa lishe nzuri.

Abdallah kama atakuwa na nia ya kucheza zaidi ya Simba, akijiwekea mikakati anaweza kutimiza ndoto zake, lakini kama anaona hapo amefika, basi atafika kweli.

TEGETE TUNAUJUA ANAJUA, MSUVA HAKUNA UBISHI…

Nirejee kwa Yanga, safu yao ya ushambuliaji iliongozwa na Tegete aliyefunga mabao yote mawili na Msuva.

Binafsi najua kama Tegete anajua na kuyumba kwake msimu uliopita kulitokana na matatizo ya kifamilia yaliyokuwa yanamkabili.

Hapa ndipo unapoonekana umuhimu wa kuwa mtaalamu wa saikolojia kikosini. Tunaona wanamichezo wakubwa duniani, ambavyo hupoteza mwelekeo kutokana na matatizo ya kifamilia.

Tiger Woods, mchezaji gofu bora kihistoria duniani, aliyumba mno mwaka juzi alipokuwa katika matatizo ya aina hiyo- kadhalika Wayne Rooney, hivyo hata wachezaji wetu nao ni binadamu kama akina Ryan Giggs.

Lakini unaweza kuona Tegete sasa akili imetulia anafanya mazoezi kwa juhudi na anajutia muda alioupoteza.

Naamini Tegete amerudi kama tu ilivyo kwa Athumani Iddi ‘Chuji’- lakini pia niseme, Yanga imelamba dume kwa Msuva. Dogo anajua na hii inaashiria kwamba akina John Bocco, Mbwana Samatta, Hussein Javu wana changamoto nzuri sana ya kukomaa kutetea namba zao timu ya taifa.

Kama Samatta, Bocco na Javu ndio washambuliaji wa Taifa Stars na wakati huo huo, Abdallah Juma, Tegete na Msuva wanafanya vizuri- dhahiri kocha Kim Poulsen atakuwa anakenua tu.

Kuwa na washambuliaji wasiopungua watano wa kiwango cha kimataifa- ni jambo la kujivunia kwa kocha yeyote wa timu ya taifa duniani. 

Nimalizie kwa kusema; wakati umefika klabu za Tanzania kuliko kukimbilia wachezaji wa kigeni, kwanza zifikirie kuwekeza kwa wachezaji wetu wazawa.

Hata wakati ule Taifa Stars ina washambuliaji tishio kibao, akina Fumo Felician, Kitwana Suleiman wote kutoka Pamba, Edward Chumila, Malota Soma wote wa Simba, Said Mwamba ‘Kizota’, Mohamed Hussein ‘Mmachinga’ wa Yanga, kutoka Tanga alikuwa anakuja Razack Yussuf  ‘Careca’ na Juma Mgunda wakati huo ni kwamba kazi ilifanyika.

Kulia ni Tegete, anayemfuatia Msuva, wakipongezwa na Nizar Khalfan kwa kazi nzuri

Viongozi wa klabu walikuwa hawaendi kutafuta wachezaji nje ya nchi- walikuwa wanawatengeneza hapa hapa. Mwaka 1992, katika Kombe la Challenge Bara ilikuwa ina timu mbili, Victoria 92 na Kakakuona iliyofika fainali.

Hata leo hiyo inawezekana, ikiwa klabu zitaamua kuwekeza wachezaji wazawa. Haitoshi tu kumsajili mchezaji na kumuingiza katika timu, lazima awekewe mipango ya kuendelezwa na bila hivyo tutaendelea kubahatisha bahatisha tu kama ilivyotokea kwa Samatta. Wasalaam, Bin Zubeiry!

Wednesday, July 04, 2012