YANGA WAANZA MAZOEZI YA UFUKWENI

Nizar Khalfan, moja ya silaha mpya Yanga

Na Prince Akbar

KLABU bingwa Afrika Mashariki na Kati, Yanga kesho asubuhi inatarajiwa kuanza mazoezi ya ufukweni katika ufukwe wa Coco Beach, Dar es Salaam ili kuwajengea stamina wachezaji wake.

Ofisa Habari wa Yanga, Louis Sendeu ameiambia BIN ZUBEIRY asubuhi hii kwamba baada ya programu ya mazoezi ya ufukweni, wachezaji hao watapelekwa gym na baada ya hapo wataingia kambini moja kwa moja wiki ijayo.

Yanga inajiandaa na michuano ya Klabu Bingwa Afrika Mashariki na Kati, Kombe la Kagame itakayofanyika Dar es Salaam kuanzia Julai 14 hadi 29, mwaka huu ikishirikisha timu nyingine mbili za Tanzania, bingwa wa Ligi Kuu, Simba SC na washindi wa pili, Azam FC.

Tayari wachezaji wapya waliosajiliwa na Yanga wamekwishaanza mazoezi Uwanja wa Kaunda, akiwemo kipa wa Simba, Ally Mustafa ‘Barthez’, Said Bahanuzi na Juma Abdul, wote kutoka Mtibwa Sugar ya Morogoro na Nizar Khalfan aliyekuwa akichezea Philadelphia Union ya Marekani.

Wachezaji wa zamani ambao hadi sasa wamekwishafika Jangwani ni Juma Seif ‘Kijiko’, ambaye kulikuwa kuna tetesi anakwenda Simba, Hamisi Kiiza, Kenneth Asamoah, Yaw Berko, Shamte Ally, Jerry Tegete, Stefano Mwasyika, Godfrey Taita, Athumani Iddi ‘Chuji’, Oscar Joshua, Nadir Haroub ‘Cannavaro’, Idrisa Senga, Omega Seme na Ibrahim Job.

Friday, June 22, 2012