WAWILI WENGINE WAENGULIWA UCHAGUZI YANGA

Kamati ya Uchaguzi Yanga ikiendesha zoezi la usaili leo. Kutoka kushoto ni Philemon Ntahilaja, Mzee Yussuf Mzimba, Mwenyekiti Jaji Mkwawa, Makamu Kikwete, Katibu Kaswahili na Katibu wa Yanga, Celestine Mwesigwa.

Na Prince Akbar

KAMATI ya Uchaguzi ya klabu ya Yanga ya Dar es Salaam, imewaengua wagombea wawili, Jamal Kisongo na Abdallah Sharia katika uchaguzi Mkuu wa klabu hiyo uliopangwa kufanyika Julai 15, mwaka huu baada ya usaili uliofanyika leo makao makuu ya klabu hiyo, makutano ya Mitaa ya Twiga na Jangwani.

Katibu wa Kamati hiyo, Francis Kaswahili, ameiambia BIN ZUBEIRY usiku huu kwamba Kisongo na Sharia walioomba nafasi za Ujumbe wa Kamati ya Utendaji, wameenguliwa kwa sababu hawakufika kwenye usaili bila ya taarifa yoyote.

Kaswahili alisema Kamati ya Uchaguzi, chini ya Mwenyekiti wake, Jaji John Mkwawa imepitisha wagombea 27 katika nafasi tatu, Ujumbe wagombea 20, Makamu Mwenyekiti watatu na Uenyekiti wane.

Wagombea wakisubiri muda wa kuingi chumba
cha usajili, kushoto ni Abdallah Bin Kleb

Mapema juzi, Kamati hiyo ambayo Makamu wake Mwenyekiti mtoto wa rais ya Jamhuri ya Muungano wa Tanzania, Jakaya Mrisho Kikwete, Ridhiwani, ilimuengua mgombea mmoja wa nafasi ya Makamu Mwenyekiti, Ally Mayay Tembele,  kwa sababu hakufika kusikiliza pingamizi alilowekewa.

Wagombea Uenyekiti waliopitishwa baada ya zoezi hilo lililodumu kwa siku nzima leo Jangwani ni Yussuf Mehboob Manji, John Jambele, Edgar Chibura na Sarah Ramadhani, wakati wagombea nafasi ya Makamu Mwenyekiti waliopitishwa ni Ayoub Nyenzi, Yono Kevela na Clement Sanga na wote watafanyiwa usaili leo.

Katika nafasi nne za Ujumbe waliopitishwa ni Lameck Nyambaya, Ramadhani Mzimba ‘Kampira’, Mohamed Mbaraka, Ramadhani Said, Edgar Fongo, Beda Simba, Ahmad Gao, Mussa Katabaro, George Manyama, Aaron Nyanda, Abdallah Bin Kleb, Omary Ndula, Shaaban Katwila, Jumanne Mohamed Mwammenywa, Abdallah Mbaraka, Peter Haule, Justin Baruti.

Awali, Mkuu wa Wilaya ya Handeni, Muhingo Rweyemamu, Mfanyabiashara Muzamil Katunzi na Katibu Mkuu wa Wizara ya Madini, Eliakhim Masu walichukua fomu za kugombea Ujumbe lakini wakashindwa kurudisha, wakati Isaac Chanzi pia hakurudisha fomu ya Makamu Mwenyekiti hivyo moja kwa moja hao hawamo katika kinyang’anyiro.

Uchaguzi huo, unaokuja baada ya Wajumbe wengi wa Kamati ya Utendaji katika uongozi uliokuwa madarakani, akiwemo Mwenyekiti Wakili Lloyd Baharagu Nchunga na Makamu wake, Davis David Mosha kujiuzulu utafanyika Julai 15, mwaka huu Dar es Salaam.

Friday, June 22, 2012