MICHUANO YA KAGAME BADO KUPATA MDHAMINI, KUANZA JULAI 14 HADI 29 DAR

Mwenyekiti wa CECAFA, Leodegar Tenga kushoto akizungumza na Waandishi wa Habari asubuhi ya leo TFF, kulia ni Katibu wake, Nicholaus Musonye

Na Prince Akbar

KUTOKANA na kukosekana kwa mdhamini wa mashindano ya Klabu Bingwa Afrika Mashariki na Kati, Kombe la Kagame- klabu zitakazoshiriki michuano hiyo iliyopangwa kuanza Julai 14 hadi 29, mwaka huu zimetakiwa kujigharamia nauli za kuja Dar es salaam na kurudi nchini mwao.

Mwenyekiti wa Baraza la Vyama vya Michezo Afrika Mashariki na Kati (CECAFA), Leodegar Chillah Tenga amesema leo katika Mkutano na Waandishi wa Habari, Ofisi za Shirikisho Tanzania (TFF), Ilala, Dar es Salaam kwamba wamechelewa kutangaza mashindano hayo yataanza lini, kutokana na pilika za kutafuta wadhamini.

Tenga amesema hadi sasa hawajapata na kwa sababu hiyo wameamua kufanya mashindano hayo bila udhamini. Tenga amesema wamekubaliana Wajumbe wa CECAFA kwa kuwa mashindano hayo hayana udhamini, basi timu zote zijigharamie usafiri wa kuja na kuondoka Dar es Salaam.

Tenga amesema CECAFA itagharamia malazi na usafiri wa ndani kwa timu zote, wakati marefa watagharamiwa kila kitu kuanzia usafiri wa kuja kutoka nchini mwao na wa ndani pia.

Tenga amesema kwamba anafurahi Tanzania kuwa mwenyeji wa michuano hii kwa mara nyingine, kwani pamoja na kupata fursa ya kuuhamasisha mchezo wa soka, lakini pia inatoa fursa kwa timu nyingi za Tanzania kushiriki.

Alisema kwamba wanafanya mazungumzo na Televisheni ya kulipia ya Super Sport na nyingine za nyumbani, ziweze kurusha mashindano hayo moja kwa moja. Lakini Tenga amesema mazungumzo yanaendelea na baadhi ya wadhamini, waweze kuchangia japo kidogo gharama za maandalizi.

Katika michuano ya mwaka huu, Tanzania itawakilishwa na timu tatu, mabingwa watetezi, Yanga, na wawakilishi Simba SC, mabingwa wa Tanzania na Azam FC ambao ni washindi wa pili.

Kwa upande wake, Katibu wa CECAFA, Nichalaus Musonye amesema wamepata maombi ya klabu kutoka nje ya ukanda huu, Vita Club ya Jamhuri ya Kidemokrasia ya Kongo (DRC), Dymanos ya Zimbabwe na Blomomfontein na Platinum za Afrika Kusini kuomba kushiriki michuano hiyo, hata hivyo kukubaliwa itategemea na idadi ya timu za ukanda huu zitakazothibitisha ushiriki wake.  

Saturday, June 16, 2012