KIMENUKA COPA COCA COLA KILOSA

Na Abdallah Jongo

VIONGOZI na wadau  wa soka wilayani Kilosa,wamekitaka chama cha soka wilayani humo KDFA kutoandaa na kusimamia  tena michuano ya copa coca cola mwakani kwa madai ya kushindwa kufikiwa kwa malengo yaliyokusudiwa.

Hatua ya viongozi hao imekuja kufuatia KDFA kushindwa kugawa vifaa vinavyotolewa na mdhamini wa michuano hiyo na kuisafirisha timu ya wilaya ya Copa Coca Cola kwenda kushiriki michuano hiyo ngazi ya mkoa

Wakizungumza na gazeti hili,viongozi na wadau hao wamesema kuwa kitendo kilichofanywa na KDFA cha kushindwa kuisafirisha timu iliyoteuliwa katika michuano ya copa coca cola kimewasikitisha na kudai kuwa hali hiyo itachangia kudumaza maendeleo ya soka kwa kushusha morali na kuwanyima fursa wachezaji chipukizi walioibuliwa katika michuano hiyo.

Aidha viongozi wa KDFA wanatuhumiwa kwa ubadhilifu wa Tshs 200,000,fulana na mipira 10 iliyotolewa na wadhamini wa michuano hiyo kampuni ya vinywaji baridi ya Coca Cola kupitia shirikisho la soka TFF na vyama vya soka vya mikoa.

"Ninachoweza kusema ni kwamba soka letu halitapiga hatua ikiwa tutaendelea kuwakumbatia viongozi wababaishaji wenye roho ya kinyama wasiostahili kusamehewa hata kidogo,wameshindwa kusikiliza kilio cha watanzania,hawana mipango ya maendeleo,ni watu wanaokula hata kidogo cha vijana,hawafai",alisema kiongozi mmoja Kilosa United aliyekataa kuandikwa jina.

"Nafikri imefika wakati TFF na coca cola kuweka wazi faida ya udhamini huu kwetu,kwani tunachoshuhudia kwa sasa ni kugeuzwa mabango ya kutangaza biashara ya kampuni na wanaonufaika watu wachache wasiovuja jasho wala kujua gharama za kuandaa timu.

"Ubabaishaji unaofanywa na KDFA umetusikitisha,wanapaswa kubadilika,ikishindikana tutagomea michuano hiyo mwakani,kwani tumechoka kuingia gharama za kuandaa timu,kulipa ada ya michuano halafu mwisho wa siku timu inashindwa kusafirishwa,vipaji vya hawa vijana vitaonekana wapi",alisema Ramadhani Mkomwa(Paparazi) kiongozi wa Rudewa Stars

Ramadhani Mtakwisha mwakilishi wa vilabu katika chama cha soka wilayani humo alikiri KDFA kushindwa kuisafirisha timu ya cop coca cola kwa madai ya ukosefu wa fedha,huku akidai kuwa tatizo hilo limezikumba karibu wilaya zote za mkoa wa Morogoro ambapo baadhi ya timu zilicheza mechi moja na kurejea makwao

Katika michuano ya mwaka huu timu tano za Kilosa United A,Behewa Stars,Kilosa United B,Tindiga FC na Kilosa Youth Kids zilishiriki mashindano hayo na timu ya Kilosa United B ilifanikiwa kunyakua ubingwa lakini haikuambulia zawadi yoyote

Friday, June 22, 2012