WAZEE YANGA WALINDE HESHIMA, HADHI YAO KLABUNI

Mzee Akilimali katikati, Mhika kushoto na Chakupewa kulia 

HAMKANI si shwari tena ndani ya klabu ya Yanga ya Dar es Salaam, kufuatia kuibuka mgogoro mwingine ndani ya klabu hiyo wa uongozi.

Nasema ni mgogoro wa uongozi, kwa sababu kinachoonekana ni kuendelea kwa vita ya kumng’oa Mwenyekiti wa klabu hiyo, Wakili Lloyd Baharagu Nchunga.

Mjumbe wa kuteuliwa wa Kamati ya Utendaji, Seif Ahmad ‘Magari’ alijiuzulu wiki iliyopita, akitoa sababu kutoridhishwa na mwenendo wa uongozi.

Seif alitoa shutuma nyingi tu kwa Kamati ya Utendaji ya Yanga- yaani kwa ujumla inaonyesha amekatishwa tamaa na hali ya mambo ndani ya klabu.

Siku moja baadaye Mjumbe wa Kamati ya Mashindano na Usajili, Abdallah Ahmad Bin Kleb naye alijiuzulu, akitoa sababu ambazo zinashibihiana na za Seif.

Hatua hizi zinakuja katika wakati ambao, Yanga imeshindwa kukonga nyoyo za mashabiki wake msimu huu, baada ya kukosa japo nafasi ya pili kwenye Ligi Kuu ya Vodacom Tanzania Bara.

Imepoteza ubingwa wa Ligi Kuu- lakini mbaya zaidi mwakani haitacheza michuano ya Afrika, labda itokee bahati Simba SC ifanikiwe kuingia hatua ya makundi ya Kombe la Shirikisho.

Yanga inaweza kushiriki michuano ya Kombe la Shirikisho la Soka Afrika mwakani, iwapo itashika nafasi ya tatu mwishoni mwa Ligi Kuu ya Vodacom Tanzania Bara.

Lakini hiyo ni iwapo tu, Simba SC itafanikiwa kuingia hatua ya makundi ya Kombe la Shirikisho la Soka Afrika (CAF).

Hiyo ni kwa mujibu wa kanuni mpya za mashindano ya klabu Afrika za Shirikisho la Soka Afrika (CAF), kwamba nchi ambazo kwa sasa zina nafasi moja moja za kuingiza timu kwenye michuano ya klabu, zitakuwa zikiongezewa nafasi moja moja katika michuano ambayo klabu yake imefanikiwa kuingia hatua ya makundi.

Kwa mfano mwaka huu Sudan imeshirikisha timu nne kwenye michuano hiyo, mbili Ligi ya Mabingwa na mbili Kombe la Shirikisho, kwa sababu msimu uliopita iliingiza timu zake kwenye hatua za makundi za michuano yote hiyo.

Tanzania bado ina nafasi moja moja tu ambazo hadi sasa tayari Simba na Azam zimejihakikishia kucheza kwa msimu ujao.

Simba SC imeonyesha dalili za kuifungulia njia Tanzania kuingiza timu tatu kwenye michuano ya Afrika mwakani, moja Ligi ya Mabingwa na mbili Shirikisho, baada ya kujiwekea mazingira mazuri ya kuingia kwenye hatua ya Nane Bora ya Kombe la Shirikisho kwa kuifunga Al Ahly Shandy mabao 3-0 katika mchezo wa kwanza wa hatua ya 16 Bora ya michuano hiyo, kwenye Uwanja wa Taifa, Dar es Salaam Jumapili.

Sasa Simba inahitaji sare yoyote au kufungwa si chini ya mabao 2-0, ili kuungana na timu nane zitakazotolewa kwenye Ligi ya Mabingwa kuwania kucheza hatua ya makundi ya Shirikisho.

Maana yake- Simba ikiitoa Al Ahly Shandy itacheza na timu iliyotolewa Ligi ya Mabingwa ili kuwania tiketi ya kucheza hatua ya makundi.

Lakini iwapo Simba itakosa nafasi ya kuingia Nane Bora, Yanga nayo italazimika kusubiri hadi msimu ujao kupigania tiketi ya kucheza michuano ya Afrika mwaka 2014.

Baada ya Seif na Bin Kleb kujiuzulu, kilichofuatia ni viongozi wa Baraza la Wazee la klabu hiyo kujitokeza na kusema wanataka kuchukua timu waihudumie, kwa sababu wameona Kamati ya Utendaji imeshindwa.

Wazee walisema wamezungumza na Mwenyekiti na amewakubalia, lakini siku moja baadaye Nchunga akaibuka na kuwasuta.

Nchunga aliwaambia Baraza la Wazee la klabu hiyo, waliotaka kuichukua timu kufuatia mgogoro unaoendelea klabuni, akisema wamuonyeshe vielelezo vya vyanzo vyao vya mapato awape timu.

Lakini Nchunga amekataa ombi au taarifa ya kujiuzulu kwa Mjumbe wa Kamati ya Usajili na Kamati ya Mashindano, Abdallah Ahmed Bin Kleb, wakati huo huo akimkubalia Mjumbe wa Kamati ya Utendaji, Seif Ahmad Magari kuachia ngazi.

Akizungumza katika mkutano na waandishi wa habari makao makuu ya klabu makutano ya mitaa ya Twiga na Jangwani, Dar es Salaam, Wakili Nchunga alisema kwamba Kamati ya Utendaji katika kikao chake cha mwishoni mwa wiki ilikubali kujiuzulu kwa Seif, lakini imekataa kwa Bin Kleb.

Kuhusu Wazee kuchukua timu, Nchunga alisema kweli alifanya nao kikao na akawaambia atakuwa tayari kuwaachia timu waihudumie kwa mujibu wa Katiba, lakini kwanza lazima watoe vielelezo juu ya vyanzo vyao vya fedha ili ajue uhalali wake, wasije wakaiingiza klabu kwenye matatizo.

Alisema anahofia wasije wakawa wanapata fedha kutoka kwa watu wenye kufanya biashara haramu ya dawa za kulevya- wakaiingiza Yanga kwenye matatizo.

Nchunga alisema iwapo watamuhakikishia vyanzo halali vya mapato, kwa mujibu wa Katiba atawaachia jukumu la kuihudumia timu na si kuhodhi madaraka ya uongozi.

Tangu hapo Wazee kimya, hawajasikika tena na jana timu ilitarajiwa kuingia kambini Bagamoyo kujiandaa na mpambano wa funga dimba Ligi Kuu ya Vodacom Tanzania Bara, dhidi ya watani wao wa jadi, Simba SC Mei 5, mwaka huu.

Kitendo cha Nchunga kupeleka timu kambini Bagaamoyo, kinaashiria Baraza la Wazee la klabu hiyo limekwama kuiteka timu kama lilivyodhamiria, ingawa jana kulikuwa kuna habari kwamba Wazee walipanga kukutana na Waandishi.

Ukifuatilia kwa kina unaweza kuona hapa kinachoendelea kina chembechembe za ‘bifu’ la Nchunga na aliyekuwa Makamu wake Mwenyekiti Davis Mosha.

Mosha alijiuzulu Machi mwaka jana baada ya kutofautiana na Nchunga- na tangu hapo inaelezwa amekuwa msituni kuhakikisha Nchunga hakai Yanga.

Ndiyo, nasema hivyo na wala sihofii chochote kwa sababu uvumi huo umeenea sana. Inadaiwa Mosha yuko msituni anataka kumuonyesha Nchunga.

Lakini kama ni kweli, basi vita hii ya Mosha na Nchunga itaifikisha wapi Yanga zaidi ya kuiharibia tu?

Hao Wazee wa Yanga wadaiwa kutumiwa na inadaiwa ni kawaida yao kutumiwa hadi imefikia wakati wanajivunjia heshima mbele ya wana Yanga.

Kama ni kweli, wanatumiwa, Wazee wa Yanga wanapaswa kujitambua na kusimamia wajibu wao- kama watu wanaoaminika kuwa na hekima na busara, ambavyo mwisho wa siku vitakuwa suluhisho la matatizo sugu ndani ya klabu.

Lakini itakuwa ajabu wao wakiwa ndiyo chanzo cha matatizo ndani ya klabu.

Inawezekana kweli kama wengi wanavyoamini Nchunga ana matatizo, lakini basi watu wasipambane naye bila kujali wanaiumiza aje klabu.

Walisema wahenga vita ya mafahari wawili, ziumiazo nyika na katika vita hii ya Mosha na Nchunga inayoumia ni Yanga.

Binafsi nawapenda wote na sipendi huu ugomvi wao wa kitoto, zaidi napenda wamalize tofauti zao na wakae pamoja kuongoza Yanga.

Mosha ni mwana Yanga mzuri, kijana, mtoto wa mjini, ‘ananuka fedha’, jasiri na mpambanaji. Nchunga ni kichwa- ana akili sana, hekima, busara na subira. Zaidi ni mwa mwasheria angavu.

Lakini pamoja na sifa hizo, wote wana mapungufu yao ya kibinadamu ambayo mimi na wewe msomaji pia tunayo.

Mzee Ibrahim Akilimali namfahamu siku nyingi sana- nilikutana naye kwa mara ya kwanza kwenye uchaguzi wa Yanga mwaka 1993 katika ukumbi wa Uwanja wa Ndani wa Taifa, ambao Dk Jabir Katundu aliibuka mshindi kwenye nafasi ya Uenyekiti na George Mpondela ‘Castro’ Katibu Mkuu.

Siku hiyo, Akilimali alitaka kugombea Uenyekiti, lakini alipofika ukumbini akaona jinsi ambavyo Dk Katundu anaungwa mkono akataka kubadilisha nafasi pale pale, agombee Umakamu- wasimamizi wa Uchaguzi wakamuambia utaratibu huo hauwezekani mzee, amua kujitoa au kuendelea kugombea nafasi hiyo hiyo.

Namheshimu huyu mzee, tena sana, mzee Hashim Mhika huyu Best wangu sana- na wazee wote wa Yanga ni rafiki zangu, hadi wale ambao wamejiweka mbali na klabu kwa sasa akina Yussuf Mzimba.

Nataka niwaambia wazee wa Yanga, wasikubali kuendeshwa na watoto wao akina Mosha Nchunga. Mzee Akilimali lazima ajue, anapotumiwa (haimaanishi anatumiwa) kwa uasi na Mosha au Nchunga, basi anajishushia thamani yake.

Wazee wa Yanga wasimamie wajibu wao kama Wazee ili waheshimiwe na waogopwe na vijana. Lakini inapofikia hadi Yanga Bomba wanawadharau wazee kama ilivyo sasa, hiyo ni mbaya sana.

Na wana Yanga wasikubali kudanganywa- kama kosa lilifanyika katika uchaguzi kwa Joel Bendera na Ridhiwani Kikwete kuuvuruga uchaguzi na hatimaye akachaguliwa mtu ambaye hakuwa chaguo la wengi, suluhisho lake si kumhujumu akiwa madarakani.

Nawakumbusha wana Yanga waliokuwapo kwenye uchaguzi siku ile, Yussuf Manji hakuwa anamkubali Nchunga, lakini alipoona kwamba ni mtu aliyetayarishwa lazima awe, akakubali na akamuunganisha na Francis Kifukwe na Mbaraka Igangula, washirikiane katika kuijenga Yanga.

Nchunga hatakaa milele Yanga, lakini Yanga itaendelea kuwapo hata baada ya kizazi hiki. Na kama kweli unaipenda Yanga, kwa nini uihujumu kwa sababu humpendi Nchunga? Sioni mantiki ya huu unaitwa mgogoro unaoendelea sasa Yanga- naona ni vyema Wazee wa Yanga wakasimamia wajibu wao, wawakutanishe Nchunga na Mosha wamalize tofauti zao, wakae pamoja madarakani kuongoza timu.

Naamini, yakiisha ya Nchunga na Mosha- hata matatizo ya Seif na Bin Kleb yataisha pia.

Kaulimbiu ya Yanga ni daima mbele, nami nasema yaliyopita si ndwele, ni juu yao sasa Wazee na akina Nchunga na Mosha kusuka au kunyoa. Wasalaam. 

Wednesday, May 02, 2012