TUNAHITAJI WATU ZAIDI KAMA BAKHRESA KUKUZA SOKA YA TANZANIA

TATIZO KUTOTAMBUA KIINI CHA TATIZO!!!

Napenda kuwasalimu wapenzi wa michezo  wote nchini hasa hasa mchezo wa soka.

Ni jambo lisilopingika kwamba watanzania wengi wanaupenda mchezo wa soka. Ndio maana hata viongozi wa soka  wa nchi kadhaa jirani zetu wamekiri hilo,mathalani tumeshuhudia kombe ka Chalenji likifanyika mara kwa mara nchini Tanzania kuliko nchi nyingine ya afrika Mashariki. Sababu kuu ambayo imekuwa ikielezwa ni washabiki kuwa wengi na udhamini mathubuti.

Hebu turudi kwenye mada yetu ambayo ninataka kuiongelea. Ni kweli kwamba watanzania wengi wanapenda soka. Lakini pamoja na mapenzi haya kuna tofauti kubwa kati ya Tanzania na jirani Zetu mathalani Kenya,Uganda,Rwanda,na Burundi katika swala la Kufadhili na kupenda timu mbalimbali katika Ligi zao. Tumeshuhudia katika ligi kuu ya nchi hizi Klabu Bingwa imekuwa ikibadilikabadilika. Hii na tofauti na hapa kwetu ambapo tumeshuhudia ubingwa ukichukuliwa na Simba na Yanga tu. Ni kweli kwamba Mashabiki wengi wa Tanzania wamejiainisha zaidi kwa Simba na Yanga hii ina maana kwamba mashabiki wengi na wafadhili wengi wameegemea zaidi katika vilabu hivi viwili. Jambo hili si baya. Tatizo hapa ni kwamba kutokana na Wengi wa wafadhili kusaidia Yanga na Simba Vilabu Vingine vya mitaani ambavyo ama si vya Makampuni au Majeshi vimeshindwa kupambana kifedha na Timu hizi kubwa hatimaye zimeishia kufanya usajili duni wa wachezaji wa kiwango cha chini  kiasi cha kuzifanya zimalize ligi ama zikiwa mkiani ama kushuka kabisa baada ya kuwa zimepanda si muda mrefu.

Katika hali kama hii ni vyema basi washikadau wa soka letu wakafikiria pia kuzisaidia timu hizi. Nampongeza ndugu yetu Bakresa aliyeamua kuanzisha timu yake ya Azam. Mtakubaliana nami kwamba timu hii walau imetoa ushindani thabiti kwa Simba na Yanga kiasi hata  cha kuifanya mpaka dakika hii iwe katika nafasi ya pili katika msimamo wa ligi na kujihakikishia nafasi mojawapo ya kuiwakilisha nchi katika mechiza kimataifa mwakani.

Sasa hebu tuangalie upande wa pili wa hoja zinazotolewa na wadau kuhusu soka letu. Mathalani kuongezeka kwa timu za majeshi katika ligi yetu. Kwa upande wangu mimi naona hili ni jambo jema sana tena linaleta changamoto. Mathalani pamoja na kutochukua ubingwa timu za majeshi zimekuwa zikitoa ushindani kiasi Fulani kwa Simba na Yanga kuliko timu za kiraia. Lakini kwa upande mwingine nataka wadau wafahamu kabla ya kukosoa uwepo wa timu za majeshi ama kuzidi kwa timu za majeshi katika ligi yetu wajiulize chanzo nini?.

 Kama nilivyotangulia kusema hapo mwanzoni swala la timu za mitaani kutokuwa na wafadhili na wapenzi wa kutosha ndio chanzo kikubwa cha kuwa na timu nyingi za jeshi katika ligi. Siku za nyuma niliwahi kusoma katika gazeti la mwanaspoti tarehe 24-27 mwezi wanne hoja iliyoandikwa na mchambuzi wangu mahiri Bwana Eddo Kumwembe. Habari hii ilikuwa na kichwa cha habari ‘’AMESHUKA AFANDE MMOJA KAPANDA MWINGINE’’  Akimaanisha kashuka Polisi Dodoma wamepanda Mgambo JKT,Tanzania Prison na Polisi Morogoro!. Mchambuzi aliendelea kushauri kwa mfano alisema kwa nini kusiwe na timu moja mathalani Jeshi la Polisi,Magereza, JKT na Jeshi la wananchi kuwa na timu moja moja kuliko kuwa na nyingi? Ati ili kuwa na Timu imara?. Niliwahi pia kusoma habari nyingine kwenye RAIA MWEMA yenye kichwa ‘’ TUSIPOKUWA MAKINI LIGI ITACHEZWA MAKAMBINI’’ habari ya Mwandishi Ezekiel Kumwaga. Mimi binafsi si afiki mawazo ya waandishi hawa kama hayatakuwa yanaanisha kiini cha tatizo na njia ya kuondoa tatizo .

Mathalani tumekuwa na kambi za Jeshi katika Mikoa mbalimbali sasa huwezi sema kuwe na timu mfano labda JKT Ruvu tu ambayo ipo Dar es salaam ndo iwakilishe JKT zote Tanzania !!! Wakati katika mikoa mingine zipo!!. Si zani kama hii ni sahihi. Kwa sababu kwa mtu yeyote anayefahamu muundo wa Jeshi huwa na Timu za michezo mbalimbali ukiwemo soka. Na kila Kambi ya Jeshi ingependa ipate timu yake ya kuiburudisha sasa kama JKT itakuwa ya Dar es salaam tu je Wanajeshiwa wa mikoa mingine watapata wapi burudani ya soka? Au wataona wapi soka??.

Pili wazo kwamba timu za majeshi ni za mwajiri mmoja halina tija kwa kuwa swala kubwa niburudani na pia hakuna sheria ambayo inakataza timu za majeshi kushiriki ligi ati kwa kuwa ni za mwajiri mmoja ingekuepo basi ningeafiki wazo la mdau. Swala kuu hapa tujiulize ni kwanini tumefikia hapa? Kwa nini timu za kiraia  mathalani zile zilizoleta ushindani wa kiwango cha juu miaka iliyopita hazipo ama kwa nini zinazidi kupotea? Kwa mfano Ipo wapi Majimaji Songea ? Wapo wapi African Sports?, Wapo wapi Pamba ya Mwanza? Wapo wapi Ushirika ya Moshi? Wapo wapi Tukuyu Stars? Wapo wapi Lipuli n.k ? Kwa nini zilishuka? Kwanini hazirudi ligi kuu? Tukiweza kutengua ni kwa nini timu hizi zimeshuka na zinashindwa kurudi nazani tutaweza kutatua tatizo.

Ushauri wangu sasa kwa wadau wenye mawazo kama ya Wachambuzi wangu  ni bora wakahamasisha watanzania mbalimbali wenye uwezo wakafanya kama M. Bakresa kwa kuunda ama kufazili timu ili zilete ushindani kwa Yanga na Simba na si Kulalamikia uwepo wa Timu za majeshi katika ligi yetu. Tukifanikiwa katika Hili basi hakuna shaka tutakuwa tumewaondolea dukuduku ndugu yangu Eddo Kumwembe na Ezekiel Kumwaga

IMEANDIKWA NA MDAU WA BIN ZUBEIRY, mpendasoka Charles. Wasiliana naye kwa email;

charlesnuru@yahoo.co.uk

Wednesday, May 02, 2012