SIMBA NA YANGA BILA UCHAWI HAIWEZEKANI?

Kipa wa zamani wa kimataifa wa Tanzania, Athumani Mambosasa wa Simba akidaka mpira mbele ya mshambuliaji wa zamani wa kimataifa nchini Kitwana Manara 'Popat' wa Yanga katika pambano la watani wa jadi enzi hizo. Pembeni ni Jumanne Masimenti akiwa tayari kutoa msaada kwa kipa wake.

SIMBA na Yanga zipo kwa zaidi ya miongo saba sasa, zikiwa ni klabu ambazo zilianzishwa wakati ambao wananchi wakiamini kwa kiasi kikubwa mambo ya kijadi, imani za kishirikina.

Tangu enzi hizo, Simba na Yanga hazishuki dimbani bila kufanya mambo ya kijadi, yaani kuloga. Mwanzoni wachezaji wa Simba na Yanga walikuwa wanapelekwa makaburini usiku wa manane, wanaogeshwa dawa maarufu kama Kombe, wanasomewa dua kali za kinga kama albadir.

Waganga walikuwa wanakwenda uwanjani kuweka dawa, wanatangulizwa kwenye njia ambazo wachezaji watapita kuelekea uwanjani. Wakati mwingine waganga wa klabu wakihisi kuzidiwa ujanja na waganga wa klabu pinzani, walikuwa wakiamuru klabu ziingie uwanjani kwa kuruka ukuta.

Hadi leo, Simba na Yanga zimeendelea kuuenzi utamaduni huu, timu haishuki dimbani hivi hivi. Lazima yafanywe mambo kwanza na kwa sababu wanaamini mambo haya, wamekuwa wakiwalipa fedha nyingi waganga.

Tatizo moja tu, timu ikifungwa, mganga hafuatwi, bali lawama huwaangukia wachezaji na makocha. Wachezaji huambiwa wamehujumu mechi au kocha huambiwa uwezo wake mdogo.

Kwa nini mganga haambiwi amehujumu au uwezo wake mdogo?

Miongoni mwa matukio ya kihistoria katika imani hizo kwenye mechi za watani wa jadi, ni lile la Agosti 10, mwaka 1974 kwenye Uwanja wa Nyamagana mjini Mwanza, wakati Saad Ali alipogongana na kipa wa Yanga, Elias Michael na kukimbizwa hospitali ya Bugando mjini Mwanza, ambako alipata fahamu siku ya pili yake na kuuliza matokeo yalikuwaje katika mchezo ambao Yanga ilishinda 2-1.

Wakati Elias Michael aliyekuwa akiitwa Nyoka Mweusi anagongana na Saad, nyuma yao alikuwapo Gibson Sembuli, mtambo wa mabao wa Jangwani enzi hizo. Michael (sasa marehemu) naye hakuweza kuendelea na mchezo, kwani aliumia mkono na kutoka nje, nafasi yake ikichukuliwa na Muhiddin Fadhil, wakati huo timu zilikuwa hazijafungana.

Nafasi ya Saad ilichukuliwa na Adam Sabu, ambaye baada ya kuingia tu aliifungia Simba bao la kuongoza dakika ya 16. Yanga ilisawazisha bao hilo dakika ya 87 kupitia kwa marehemu Gibson Sembuli, na hadi dakika 90 zinakamilika matokeo yalikuwa 1-1.

Huo ulikuwa mchezo wa fainali wa kumtafuta bingwa wa nchi, hivyo ni sawa na zege halilali, lazima mshindi apatikane, hivyo ukahamia kwenye dakika 30 za nyongeza na katika dakika ya saba tu, Sunday Manara aliyekuwa akiitwa Computer, aliifungia Yanga bao la ushindi.

Jambo la kustaajabisha, eneo ambalo alianguka Saad, paliota kichuguu, ambacho uongozi wa Uwanja wa Nyamagana pamoja na kuking'oa mara kwa mara kimekuwa kikiota tena na tena. 

Tukio lingine la ushirikina, ni baada ya Yanga kufungwa 6-0 na Simba Julai 19, mwaka 1977, wachezaji wa Yanga walidai kwamba waliogeshwa maji ya maiti badala ya Kombe. Yaani mtu aliyekwenda kuchukua dawa kwa mganga, aliigeuka Yanga na akaisaliti kwa kuwapa maji ya maiti.

Lakini mwaka 1981, wachezaji wa Yanga walimgomea Mwenyekiti wao wakati huo, Juma Shamte kuamka kwenda kwenye kambi nyingine Bagamoyo kutoka Kibaha walipokuwa wamejificha. Shamte aliwafuata wachezaji na kuwaambia kambi hiyo 'imeonwa' hivyo kwa kuhofia kufungwa, wahamie Bagamoyo.

Wakati huo Yanga ilikuwa haijaifunga Simba kwa miaka sita tangu ilipoifunga mara ya mwisho mwaka 1875, mabao 2-0 visiwani Zanzibar kwenye Klabu Bingwa Afrika Mashariki na Kati.

Lakini wachezaji wenye msimamo, akina Charles Kilinda, Charles Alberto na marehemu Juma Mkambi, waliwaongoza wenzao kugoma kuhama kambi usikuwa wa manane. Walimuambia Shamte, aende na wakifungwa potelea mbali, lakini muda ule, walihitaji kupumzika tu.

Lakini ilipowadia siku ya mchezo, Septemba 5 mwaka 1981, Juma Shamte alisuuzika na roho yake kwa bao pekee la Juma Mkambi 'Jenerali' aliyemtungua Omar Mahadhi kwa kichwa akiunganisha krosi ya Salehe Hijja dakika ya 42.

Hamisi Kinye siku hiyo alidaka kwa uhodari mkubwa na kukwamisha juhudi za wapachika mabao wa Simba, akina Nico Njohole, Thuwein Ally, Adam Sabu na George 'Best' Kulagwa.

Mabeki wa Simba walikuwa Yussuf Ismail Bana, Mohamed Kajole (sasa marehemu), Daud Salum "Bruce Lee', Mohamed Bakari 'Tall' na Athumani Juma Kalomba (sasa marehemu). Lakini pamoja na wakali hao, Yanga ikiongozwa na kocha Ray Gama ilivunja mwiko wa kutoifunga Simba kwa miaka hiyo sita.

Imani za kishirikina zimeendelea kuenziwa hadi leo, ingawa vyombo vya habari vimekuwa mstari wa mbele katika kuwaelimisha viongozi wa klabu hizo kuachana nazo.

Katika mechi ambayo Yanga ilishinda 1-0, Uwanja mpya wa Taifa, Oktoba 26 mwaka 2008, mashabiki waliona kitendo cha aliyekuwa Mwenyekiti wa Simba, Hassan Dalali kuingia na mchezaji wake, Mussa Hassan Mgosi na kwenda kuweka vitu vyao kwenye lango ambalo Yanga walianzia, lakini hawakuona nini kilitokea kambi ya Yanga, New Africa Hotel, mchezaji Boniphace Ambani aligoma kufanyiwa ndumba na waganga waliopelekwa kwa ajili ya kuilogea timu.

Alisema yeye mganga wake ni Yesu Kristo, hawezi kufanya hivyo na kweli Ambani kwa nguvu za amuaminiye, alitoa pasi ya bao pekee kwenye mchezo huo, ambao hakuumaliza kutokana na kuchanika nyama za paja.

Ukisikia Simba inakwenda Zanzibar kuweka kambi, siyo kwamba inafuata mazingira mazuri, la hasha, bali wanakwenda kwa wataalamu wanaowaamini katika mipango ya ndumba za ushindi. Kadhalika Yanga ukisikia wanakwenda Bagamoyo, si kwamba wanafuata mazingira mazuri, bali wanakwenda kwa wataalamu wao wa 'juju'. Ni kwamba, huwezi kuzitenganisha hizi klabu na ndumba, ni sehemu ya jadi yao.

Tuesday, May 01, 2012